基斯普執教生涯首次奪冠!領軍勇奪南美球會盃

睇足365 於 25/01/2021 發表 收藏文章
近年球壇好多名宿教波,佢哋雖然可以憑球員時代名氣、關係、威望、經驗中得益,但仍然要克服好多挑戰先可以取得成功。阿根廷名將基斯普滿頭白髮,其實都只係45歲,喺教頭之中仍然算係年輕,最近佢就守得雲開,拎到執教以嚟第一個冠軍,而且係份量相當足夠嘅南美球會盃!

loading

45歲嘅阿根廷名將基斯普(Hernán Crespo)球員生涯效力過帕爾馬、車路士、拉素、AC米蘭、國際米蘭等球會,更為國家隊上陣64次。退役之後,基斯普2014年於帕爾馬出任青訓教練,之後一年就去到意乙嘅摩德納(Modena F.C. 2018)初嘗領軍滋味,可惜大半季後因為成績欠佳而被炒。直至2018年底,基斯普重返阿根廷,執教阿甲球隊班菲特,9個月後同樣再次被炒。2020年1月,基斯普出任防衛者(Defensa y Justicia,又稱國防司法隊)主帥。


基斯普帶領防衛者以第6名完成第一個球季,進軍南美球會盃。喺星期六舉行嘅南美球會盃決賽,防衛者面對同樣嚟自阿甲嘅拉魯斯,以3-0大勝對手,一舉奪得南美球會盃。南美球會盃(Copa Sudamericana)係南美洲第二級別球會盃賽,僅次於南美自由盃(Copa Libertadores)。換言之,如果以南美自由盃喺該區相當於歐聯喺歐洲嘅地位去理解,咁南美球會盃就相當於歐霸。呢個冠軍,除咗係基斯普執教生涯第一個錦標之外,亦係防衛者第一個主要錦標,呢間85年歷史嘅球會不但從來冇拎過本土頂級聯賽冠軍,亦冇拎過任何本土盃賽冠軍,只係拎過阿乙、阿丙同阿丁嘅冠軍,所以呢個南美球會盃絕對足以令基斯普成為球會傳奇教頭。

loading

賽後,基斯普除咗大讚球員踢出球會史上最精彩一場比賽之外,亦談及自己已有一年未能與女兒會面。據聞國內更具規模球會如競賽會、聖羅倫素及獨立隊,同樣有意招攬基斯普。基斯普就同傳媒講:「我希望可以執教南美洲嘅大球會,或者等待一個執教歐洲球會嘅機會,當然我冇可能拒絕皇馬之類嘅球會啦!」

loading

精華片段
https://youtu.be/Zf5uymbhTNs

留言


請按此登錄後留言。未成為會員? 立即註冊
    快捷鍵:←
    快捷鍵:→