卻奧斯突與奧巴美揚口水戰，奧斯爾加入戰團企邊面？

入球慶祝對於足球員嚟講別具意義，有人純粹表達興奮之情、有人嘅動作係做俾心愛嘅家人或另一半睇、有人係向前輩或隊友致敬，甚至有宗教意義，總之就係各有精彩各有意義，亦都成為咗球員嘅個人標誌。同時，亦都有球員對花巧嘅慶祝動作（甚至慶祝這個行為本身）不以為然，例如巴洛迪利就曾經拒絕慶祝，並解釋前鋒入球就好比郵差將信送入信箱，唔需要慶祝，當然他之後都有繼續慶祝入球。最近，皇家馬德里中場卻奧斯竟然因為慶祝動作而同阿仙奴前鋒奧巴美揚喺社交媒體上有所爭拗，希望唔會傷和氣啦！

根據德國《圖片報》報道，效力皇馬嘅德國中場卻奧斯近日喺一個podcast節目上面，談及自己對慶祝動作嘅睇法，更點名批評奧巴美揚嘅慶祝動作愚蠢。卻奧斯表示：「如果慶祝動作涉及預先編排嘅舞步，我覺得係愚蠢嘅。更差嘅係將物件收喺波襪入面。奧巴美揚就試過慶祝時拎個面具出嚟，呢個我真係接受唔到。我亦覺得咁樣做唔係一個好旁樣，簡直係胡鬧。我一直喜歡嘅係『轟炸機』梅拿嗰種，佢只係跳起，掹住條褲。呢個係真正嘅喜悅，唔使搞太多。」


報道被轉載之後，奧巴美揚喺Twitter上面tag咗卻奧斯，問佢有冇小朋友，奧巴美揚話係為自己嘅小朋友而咁樣做，而且將來亦會繼續做：「希望你將來有小朋友嗰陣都會好似小學生咁樣氹佢哋開心。」奧巴美揚除咗試過扮蜘蛛俠，亦都試過扮黑豹，一來黑豹喺佢家鄉加蓬有特別意義，二來佢亦都向扮演黑豹嘅演員致敬。


卻奧斯被奧巴美揚tag咗之後回應話自己屋企有三個小朋友，奧巴美揚就話恭喜佢哋，同埋送上一幅自己同萊斯扮演嘅蝙蝠俠與羅賓。



現時喺阿仙奴處境尷尬嘅奧斯爾，喺德國隊同卻奧斯合作多年，佢又如何自處呢？奧斯爾專登喺呢個時候，出咗一張奧巴美揚戴面具扮黑豹嘅gif圖，仲話係最佳慶祝，咁你話代表咩呢？


其實，卻奧斯一向為人比較古板撲實，據講佢多年嚟都係穿著同樣款式嘅波呠，所以 睇落佢的確係唔鍾意花巧嘢，而佢表達個人意見亦都冇問題，不過為咗慶祝動作咁少事，點名批評另一位球員，又好似過咗少少火位。至於奧斯爾自因為土耳其風波喺德國飽受批評，及退出國家隊之後，估計同部分「純」德國裔隊友關係已經麻麻，企喺「開心果」奧巴美揚嗰邊亦都唔算令人意外。