又係阿爾巴尼亞！港足中場杜國榆可否踢歐霸外圍賽？月底自有分曉

日前同大家分享過香港女子足球員韋婉婷於阿爾巴尼亞女子聯賽班霸維拉斯尼亞 (Vllaznia) 效力嘅消息，一旦獲得留用，下季將會參加女子歐聯 (《準備踢歐聯的香港球員——韋婉婷》)。當時，講起現時香港男子足球員甚少有外流機會，杜國榆 (Rémi Dujardin) 正正係少數獲得加盟歐洲球會機會嘅球員。事有湊巧，杜國榆亦加盟一支阿爾巴尼亞球隊。


23歲嘅杜國榆司職防守中場，係一名生於香港嘅法國台灣混血兒，兒時曾經效力傑志及飛馬青年軍。2015年，杜國榆前往美國升讀大學，並代表 St. Bonaventure University 校隊參加大學聯賽，期間亦曾效力美國第4級別聯賽職業球隊Rochester Lancers。2019年大學畢業後，西乙B球隊胡米利亞 (Fútbol Club Jumilla) 向杜國榆開出合約，但半年後球會就財困解散。另一方面，杜國榆曾為香港出戰2019省港盃並奪得冠軍。至今年1月，杜國榆前往芬蘭足球超級聯賽球會HIFK赫爾辛基 (HIFK Fotboll) 準備簽約，並參加球會訓練及友賽，原定於4月正式加盟，可惜球季因為疫情被推遲至6月，杜國榆亦轉而尋求其他機會。


7月14日，香港傳媒報道，杜國榆將加盟阿爾巴尼亞超級聯賽球隊柏迪遜地拉那 (FK Partizani Tirana) ，柏迪遜地拉拿位於阿爾巴尼亞首都及最大城市地拉那 (Tirana) ，貴為上屆聯賽冠軍。今季，柏迪遜地拉那暫時只係喺10支球隊中排第6位，兼且剛剛換帥，餘下兩場比賽嘅任務係追趕相差4分嘅歐霸外圍賽參賽資格，其中下一仗正正係對第4位球隊Teuta嘅「6分波」，最後一仗就對尾三位護級球隊維拉斯尼亞 (Vllaznia，其女子球隊正係韋婉婷所效球隊) ，所以柏迪遜地拉那來季參加歐霸外圍賽首圈仍有一定希望。換句話講，假設事情往最好方向發展，來季將會有一名香港男子球員出戰歐霸、一名女子球員出戰歐聯。