英超開會竟有球會提議於中國復賽，中國網民：「滾！」

歐洲疫情繼續嚴峻，足球聯賽仍然復賽無期，對於如何處理今個球季，出現唔少爭議，比利時甲組聯賽就率先準備腰斬聯賽，《BBC》報導指比甲董事會上，所有球會代表一致通過腰斬聯賽，由於榜首布魯日於僅餘下一輪常規賽下，已領先次席真特15分，因此冠軍將會直接頒予布魯日，賽會將會於短期內討論及公布對歐戰席位及升降班嘅處理方法。不過歐洲四大聯賽恐怕就唔可以如法炮製，因為佢哋嘅冠軍爭持相對激烈，而且多個歐戰席位及升降班名額牽涉大量金錢問題，即使係英超榜首利物浦領先多達25分，各界對是否可以直接宣布頒獎俾利物浦仍充滿爭議，到底今季英超應何去何從？

早前，歐洲足協已警告，如成員協會將聯賽腰斬，有可能不獲分配下季歐洲賽席位；另一方面，英超亦必須極度謹慎研究各個處理方案，以避免爭議甚至法律訴訟。根據多方報導，英超董事會近日進行會議討論賽季餘下安排，20間球會中，有18間認為應完成今個球季，至於如何完成、何時重開就未有定案。 (根據晚上最新消息，今日會議最終結果為英超賽會宣布5月初亦不會復賽，直至疫情好轉)
《The Athletic》報導，指出大部分球會希望完成今個球季嘅主因，係球季一旦腰斬，英超球會估計將損失合計7.62億英鎊電視轉播收益。早前，BeIn Sports及Canal Plus兩家電視台已決定延遲向法國球會支付轉播費，勢必令部分球會周轉困難。




不過，英超球會暫時仍未能就繼續聯賽嘅方案達成共識。《The Athletic》指，會上有球會代表提出應探討於海外重開聯賽嘅可能性，甚至將中國作為一個方案，但未有公開邊一間球會提出。有意見認為，雖然中國係武漢肺炎首個爆發地區，但近日疫情轉移到歐美等地，中國疫情反而已經受控，更準備逐步解封，因此仍比歐洲安全，更可順道將球會設施外借作抗疫用途，減輕英國醫療系統負擔。預料有關提議當然唔會得到大多數球會同意，英超球會將會於周五再次進行會議討論不同方案。話雖如此，報導一出仍引起輿論嘩然，認為提議荒謬，更有人認為只係「曲線」諷刺賽會急於復賽而冇考慮職球員安全。



英超20支球隊中，狼隊與中國關係最為密切，該球會由中國復星集團持有。另外，中國國家主席習近平曾經做訪曼城訓練基地，該球會由阿聯酋阿布扎比皇室透過城市足球集團持有，而兩家由中國國家資金投資嘅企業亦於近年入股城市足球集團。以上兩間球會只屬個人聯想，由其他球會提出亦不足為奇。

雖然提議可能係由與中國關係密切嘅球會提出，但中國部分球迷就拒絕呢份「好意」，認為即使英超球會願意，亦要考慮中國14億人民意願，又認為英超球會到中國作賽反而會成為播毒者；當然亦有部分球迷表示歡迎，認為可振興經濟，更有人表示要「好好招呼」曾因涉及維吾爾言論而被中國封殺嘅奧斯爾。


Source: The Atlantic、givemesport、DailyMail