逆境中默默支撐阿仙奴的替工——18歲小將薩卡成隊內助攻王 精選

英超傳統Big 6之一嘅阿仙奴，今季表現不濟，跌出前六位置，12月底經歷換帥，新帥阿迪達上任後球隊表現有所改善，但亦所限於傷兵等問題。雖然踏入2020年後至今未逢一敗，但同時和多勝少，成為英超和波王。最近一場比賽，球隊於歇冬特訓後，以4-0大勝紐卡素，係近5場聯賽首次贏波，亦寫下今季球隊最大勝仗，但賽後暫時仍只排第10位，喺今季嘅高低起伏之下，阿仙奴最值得鼓舞嘅係部分年輕球員嘅成長，其中小將薩卡 (Bukayo Saka) 更係喺呢一輪低谷中默默支捧阿仙奴嘅無名英雄。


2001年於倫敦出生嘅薩卡司職左翼鋒，一直於阿仙奴青訓學院受訓，早於2018年11月已於歐霸分組賽上演職業生涯首戰，2019年1月1日亦首次為阿仙奴於英超登場，當時作為一位初上一隊嘅年輕球員，未有令人留下太深刻嘅印象。僅僅大半年之後，佢喺新球季開始正式冒起，成為阿仙奴於盃賽輪換嘅「主力」，2019年9月出戰歐霸盃對法蘭克福，個人貢獻一入球兩助攻，鋒芒初露。


12月中，阿仙奴遇上左閘荒，兩名正宗左閘高拿仙歷及迪恩尼同告受傷，由於右閘同樣缺人，時任領隊艾馬利未能再以右閘長期替工美倫賴奧斯客串左閘，於是喺英超賽場上仍然經驗尚淺嘅薩卡臨危受命，為球隊客串左閘。對於呢位翼鋒出身嘅小將而言，起初幾場客串嘅表現，未能要求太多，亦可以理解佢喺防守意識上有所欠缺，只能以速度補足，加上左閘經常需要由己方後場直奔到對方底線助攻，體力消耗大增及未能準確捏後上時機，佢連平常踢左翼嘅進攻能力都未能完全發揮，傳中質素大受批評。


幸好喺阿迪達調教下，薩卡進步神速，佢喺防守方表現漸見成熟，體力留放、後上時機亦有進步，傳中質素未有太大改善，但懂得揚長避短，更多善人個人長處盤球突破落底，或切入禁區傳出地波，短短幾場比賽後已經成為一名稱職左閘，佢喺左路嘅突破成為球隊打破悶局嘅利器之一。

最近一場英超比賽，薩卡第9次於左閘位置出戰英超，協助球隊大勝紐卡素，上半場進攻表現唔算好，但下半場多次於左路突破構成威脅，其中一次於底線附近突破兩人包抄，「通坑渠」切入地波傳中，助攻予尼高拉斯比比輕鬆射成2-0。


至此，薩卡已於各項賽事交出8次助攻，力壓諸位成名球星，比陣中任何球員多出2次，亦比今季英超球隊任何小將更佳。雖然佢嘅助攻大部分都係喺擔任左翼時取得，但佢喺左閘位置上嘅進步已經有目共睹。



阿迪達上任後，阿仙奴陣中有唔少球員表現有所進步，協助球隊重上正軌，例如格列沙加、奧斯爾兩名一直飽受爭議之人就表現得判若兩人，托利拉重拾剛剛加盟嘅勇態，但如果阿仙奴冇一位稱職嘅左閘替工，留下一個具大漏洞，本來已經不擅防守嘅球隊必然雪上加霜，可以話薩卡將球隊嘅下限提升，支撐咗左閘荒下球隊最弱一環。


評價取決於期望，現階段嘅薩卡，當然唔係乜嘢世界級球員，甚至唔算一位超級新星，但一位周薪3000英鎊嘅18歲替工嚟講，呢個表現我會俾100分，今場比賽奪得Sky Sports Man of the Match亦係對佢近期表現嘅一個肯定。