巴爾睇波都得罪皇馬迷，第5次早走兼創個人最早紀錄

皇家馬德里球星加利夫巴爾向來喺皇馬飽受批評，有傳佢同主帥施丹不和，球迷對佢場內場外嘅事亦相當不滿，啱啱一場西班牙國王盃賽事，巴爾因傷缺陣，只係喺看台上睇波，但佢連睇波都一樣得罪皇馬球迷，再一次佐證佢繼續留喺皇馬唔會有運行。


加利夫巴爾早期主要面對嘅批評，係佢以天價轉會費加盟但經常受傷，難以持續交出好表現，亦無法撐起球隊。去到近期，球迷對佢嘅批評已經轉移到私人層面，包括隊友透露佢加盟多年都未有練好西班牙語、唔願意參加隊內聚會等等，就連鍾意打高爾夫球亦都係批評嘅原因之一。


其實呢啲對佢場外活動嘅批評都係「兩睇」，如果加盟接近7年都學唔好西班牙語，的確可能係冇心學習，佢自己要需要負上責任，但一來真係有人語言天分極低，二來又有人話巴爾西班牙語唔係真係咁差，只係唔願多講；唔願意參加隊內聚會就更加有合理解釋，因為呢啲隊內聚會舉行嘅時間都係夜晚，巴爾一向堅持早睡早起，你甚至可以讚佢有職業素養；至於打高爾夫球，其實每個球員都有自己嘅興趣，只要唔係影響到比賽或因此受傷，旁人都好難批評啲乜，不過如果巴爾真係因為經常打高爾夫球而引致受傷，咁就真係抵鬧要好好反省。

(巴爾喺國家隊曾經接過並展示呢面球迷準備嘅旗幟，上面標語表示威爾斯及高爾夫球重要性喺皇馬之上，亦令皇馬球迷不滿)

噚晚西班牙國王盃賽事，皇馬主場3:4不敵皇家蘇斯達而出局，皇馬迷自己好嬲，連只係喺觀眾席睇波嘅巴爾，都難逃一劫，成為批評對象。巴爾近幾仗因為腳踝受傷缺陣，今場繼續休息，喺主場觀眾席觀看球隊比賽，但佢喺球隊69分鐘落後至1:4之後，就選擇提早離場，大約於75分鐘左右被影到開車離開球場，被指唔尊重球隊。


事實上，巴爾並非首次提早離場，《阿斯報》、《馬卡報》等表示巴爾過去曾經被發現4次提早離場，其中包括球隊大勝隊手或0:0悶和等場面，佢一般都係提早10分鐘，今次提早到15分鐘，刷新咗個人最早離場紀錄。

從各個事例都可以睇到，巴爾都係一個幾我行我素嘅人，佢想做一樣嘢，未必會理會其他人喺背後講乜，呢種性格本身冇話好定唔好，你可以話佢剛愎自用、「獨家村」，從好嗰面睇亦可以話係特立獨行、唔隨波逐流，但總之而家嘅情況就可以肯定，不論係巴爾嘅錯、皇馬嘅錯、球迷嘅錯、社會嘅錯，乜都好，佢呢種性格絕對唔適合繼續留喺皇馬，勉強冇幸福。

要上陣時間，巴爾只要唔受傷，去到其他球隊應該都係必然正選，反而皇馬陣中有其他選擇，主帥施丹喺季初更曾經表示希望巴爾離隊；要賺錢，一直傳聞巴爾受到中超及美職聯球會邀請，呢啲球會一般都係靠超高人工吸引球星加盟，加上西班牙一向重稅及多稅務糾紛，離隊隨時賺得多過留喺皇馬；要開心，巴爾喺皇馬可以話係動輒得咎，無論做乜都會被批評，喺主場都會被嘘，同隊友、主帥相處亦唔見得融洽，係時候轉換環境啦。