不點名批球員,惹美斯公開反擊 艾比度被會長照肺免炒

睇足365 於 06/02/2020 發表 收藏文章
西甲球會巴塞隆拿球會內部最近出現問題,體育總監艾比度 (Eric Abidal) 批評球員,引起隊中球星美斯不滿,更公開反擊,情況相當尷尬,或會影響隊內士氣。早前有傳艾比度或會因此被炒,但最新報導顯示,艾比度與會長巴杜美 (Josep Maria Bartomeu) 會面後,獲得留任。

loading

巴塞隆拿今季罕有地於球季中段易帥,解僱一直於球迷間頗受爭議嘅華維迪 (Ernesto Valverde) ,改由施迪安 (Quique Setién) 擔任主帥。巴塞體育總監艾比度亦係前巴塞球員,佢早前向《每日體育報》 (Diario Sport) 認為部分球員需要為球隊換帥負上責任,佢表示「好多球員都唔開心,而且唔夠努力,球會出現咗內部溝通問題。」,令佢同球會決定換帥。

正所謂「家醜不出外傳」,艾比度公開批評球員,而同艾比度都做過隊友嘅美斯,身為巴塞隊長及球星,亦都選擇喺個人instagram公開回應,仲相當直接:

「坦白講,我唔鍾意回應呢啲嘢,但我認為每個人都要為佢嘅工作負上責任,同埋為自己嘅決定負責。

球員要為球場上嘅事負責,踢得唔好嘅時候,我哋係第一個人知道。

管理球會方針嘅人 (指體育總監) 亦都要面對自己嘅責任,更要為自己嘅決定負責。

最後,當你談論球員時,應該點名講,否則就係沾污每一個人嘅名,而且散佈謠言。」

字裡行間,可以睇得出美斯對艾比度言論嘅不滿,兩人各自都喺公開渠道談論球會內部矛盾,實在唔係好現象,有可能破壞隊內團結及令球隊士氣下滑。有傳言指,艾比度或會因此被球會解僱,以定軍心。事實上,今次並非艾比度首次引起爭議,早前球會於易帥過程中,名宿沙維表示受到球會邀請,但時機未到而拒絕,但艾比度就公開表示球會並冇向沙維正式提出斟介。該番言論令沙維相當不滿。

loading

loading

根據《馬卡報》等傳媒報導,巴塞會長巴杜美於星期三召見艾比度,會面歷時約兩小時,球會未有任何宣布,相信巴塞唔會因此而解僱艾比度;另外,有指巴杜美亦與美斯會面,成功促使二人和解。

loading


有分析認為,即使危機暫時得到處理,球會內部矛盾已經令部分球員感到不快,特別係美斯過去甚少公開評論球會內部事務,部分球員甚至有可能因此產生離心。

loading

留言


請按此登錄後留言。未成為會員? 立即註冊
    快捷鍵:←
    快捷鍵:→