【一反常態】咁撞得,去打美式足球吖笨!

睇足365 於 07/01/2020 發表 收藏文章
無論喺街場打籃球或者踢足球,都可能會聽過或者講過一句說話:「唔撞得,去打乒乓球啦!」呢句說話係用嚟形容一啲球員好介意身體碰撞,雖然唔知點解係乒乓球,而唔係網球、羽毛球、桌球。另一方面,足球場上比較少見到一啲強壯如健美先生嘅球員,咁呢啲球員又會唔會俾人嫌太撞得,叫佢去打欖球或者美式足球呢?


英超狼隊翼鋒艾達馬查奧爾 (Adama Traore) 初初於英超亮相時,著住波衫喺球場上跑動,已經令人對佢強壯嘅身軀印象深刻,最近有一張佢側面show肌肉嘅相,更加令人驚訝,竟然有一位咁大隻嘅足球員。一般印象中,球員太大隻、上身太多肌肉,太極端時會降低運動機能,畢竟足球係一項90分鐘,既需要耐力,又需要爆發力同技術嘅運動,所以好少見到有頂級足球員練到「筋肉人」咁樣。應該話,足球員分配喺肌肉鍛煉上嘅時間一般都適可而止,去到某個水平就會停,不如練返波好過。被稱為最壯球員嘅 Adebayo Akinfenwa 不過係英乙球員,而且佢龐大嘅體型的確對佢運動能力有好大影響。

(Adebayo Akinfenwa)

不過艾達馬查奧爾係一個異類,佢既係一個「筋肉人」,亦係「短跑好手」,除咗喺比賽中可以見識到佢速度之外,佢喺遊戲《FIFA 20》中亦擁有96速度,係全英超速度最快嘅球員,不過佢嘅體格數值竟然只有75,真係要改改佢。另外,由佢粗獷嘅身型,未必聯想到,佢居然係出身於巴塞隆拿嘅拉瑪西亞青訓營,由8歲19歲都喺巴塞度過,佢嘅風格何謂粗中帶細,速度、對抗性、盤球技術加於一身,令佢打破英超盤球過人紀錄。

loading


艾達馬查奧爾嘅狼隊隊友路曼沙斯 (Romain Saïss) 就透露私下傾計時,艾達馬查奧爾話真係有美式足球隊搵過佢:「有一次我同佢講『你跑步好似美式足球員』,佢就話我知,佢喺巴塞隆拿嗰陣,真係有NFL美式足球聯盟球隊嘗試邀請佢加盟,證明佢爆發力有幾強呢!」

到底艾達馬查奧爾係唔係唔練波,不斷去舉重?路曼沙斯就話冇咁嘅事:「我每日都見到佢,練波前後會一齊做GYM。可能佢返屋企再操啦,不過球會訓練嗰陣,佢從來唔會舉鐵。」

最近狼隊推出一條短片,搵嚟幾位球員玩遊戲,拎起一個裝滿水嘅大啤酒杯,鬥手臂耐力,邊個贏唔使講啦!

https://youtu.be/rqg-48SI6-w
Source: Goal
標籤: 艾達馬查奧爾  查奧爾  

留言


請按此登錄後留言。未成為會員? 立即註冊
    快捷鍵:←
    快捷鍵:→