龍格堡回應史高斯無理服裝批評 球迷:「著底褲都型過史高斯啦!」

睇足365 於 04/12/2019 發表 收藏文章
阿仙奴正陷於水深火熱之中,上星期宣布與艾馬利解約,改由名宿兼原任助教龍格堡暫代主帥一職。龍格堡走馬上任兩日就要領軍出戰,結果只能以2-2賽和護級分子諾域治,表現未如人意。擔任球評嘅曼聯名宿史高斯單憑龍格堡首戰嘅衣著,就斷定佢並非阿仙奴主帥合適人選,龍格堡喺今周賽前記者會上一笑置之。


龍格堡於領軍首戰,穿上裇衫、毛衣及球會外套督師。前曼聯中場史高斯於電視節目上批評龍格堡未有穿上西裝:「你會認為佢應該會著起一身西裝,去表示佢對接任呢份工作嘅驕傲。對我嚟講,呢個係一個重要嘅開始,應該著份裇衫、打呔去展現紀律。我認為佢唔係合適嘅人選。」

阿仙奴將於今個周中快車期迎戰白禮頓,今日召開賽前記者會,龍格堡於會上回應史高斯嘅批評:「哦真係好重要嘅事嚟喎!因為事情發展得太快,咁啱我套西裝就拎咗去乾洗,所以趕唔切拎嚟著囉。

我都見過有英超教練著運動裝,有教練會著西裝,又有教練會著毛衣,所以我自己會決定比賽日著咩衫。我仲未度身訂造一套球會西裝,不過我唔覺得呢個係值得討論嘅事。我第時會俾大家知道我將會著咩衫。」

其實龍格堡一直都以型格見稱,球員時代就曾經染有一頭特別惹人著目嘅紅色頭髮,又曾經為著名內褲品牌拍攝廣告,亦係時裝達人,難怪有球迷佢著底褲都型過史高斯,著衫使你教?


Source: SkySports

留言


請按此登錄後留言。未成為會員? 立即註冊
    快捷鍵:←
    快捷鍵:→