【遍地開花】智利抗爭21死2500傷，維度等國腳集體罷踢 精選

仲講緊「政治遠離足球」嘅人應該係活喺平行時空。近月世界各地都爆發大規模抗爭行動，球員、球迷都係人，同樣會受到政治、社會因素影響，足球成為表達訴求，甚至進行抗爭嘅場域，一直都發生緊。例如早前嚟香港踢世界盃外圍賽嘅伊朗，國內有女球迷因抗議女性被禁止入場觀看男足賽事而自焚，你以為伊朗人保守怕事？有頭有面嘅一眾伊朗國腳，唔少都有喺網上為此事發聲。最近，菲律賓、伊拉克、加泰隆尼亞、玻利維亞、智利等地都有抗爭行動，智利國腳更索性罷踢今個國際賽期嘅比賽。


南美洲國家智利早前由地鐵加價，逐漸演變成要求全面改革嘅全國大規模示威，據報至今已造成21死、近2500人傷、5400人被捕。事件緣於智利首都聖地牙哥地鐵加價4% (年頭已曾加價)，令民眾於10月中旬上街抗議，行動本來十分「和理非」，但政府一直漠視訴求，加上警方暴力鎮壓，做出暴打示威者、將示威學生踢落扶手電梯等惡行，令示威者將行動升級。


單單地鐵加價4%就引發暴動，對香港人而言係難以想象，事實上原因亦唔係咁簡單。因為自從美國於1973年9月11日透過中央情報局扶植右翼獨裁者皮諾契特 (Pinochet ) 上台 (推翻及逼死原左翼民選總統阿連德Salvador Allende) 後，智利推行一系列經濟「自由化」政策，大批國有企業及公共事業私有化，長久以嚟嘅「新自由主義」方針製造所謂「經濟奇蹟」，其實一般民眾從「經濟奇蹟」中所得甚少，甚至日常生活開支不斷上升，學費、車費連年上漲令佢哋百上加斤。


今次政府繼續漠視民意、警察暴力鎮壓，令智利人民幾十年嚟嘅不滿一口氣爆發，縱火破壞地鐵站及車廂、襲擊警車、破壞智利國家銀行、外資電力公司、Walmart等，總統Sebastián Piñera實施宵禁及軍事接管，近日宣布撤回加價政策、為稱市民為暴徒而道歉，又承諾成立獨立調查委員會，但更深層次嘅矛盾仍繼續驅使民眾上街。


智利國腳維度 (Arturo Vidal) 及巴禾 (Claudio Bravo) 早前都曾經公開聲援國內示威民眾，國家隊原定今個國際賽期安排與玻利維亞及秘魯友賽，玻利維亞一戰已因玻國示威取消，剩低作客秘魯一仗。智利足協於當地星期三公布，智利球員集體決定將人會出戰對秘魯嘅友賽，因此球員已獲批准離開。

效力利華古遜嘅智利中場阿蘭古斯 (Charles Aranguiz) 星期二受訪時表示，認為基於尊重，現時進行友賽並不恰當。美度 (Medel) 就表示，國內抗爭係一場更重要嘅比賽，希望所有智利人可以生活喺更公平嘅國家，支持示威，但希望事件可以用非暴力及冇人受傷嘅方式進行，呼籲示威者及警察都要克制。維度就話全力支持民眾爭取公義。

Source: France24、DailyNation、轉角國際