咩叫球王？馬勒當拿帶隊作客，對手場邊準備王座伺候

阿根廷球王馬勒當拿（Diego Maradona）係一個具爭議人物，例如「上帝之手」事件、吸毒等等，但正正係佢嘅我行我素、大癲大肺、爭議、球味，再結合埋佢無可爭辯嘅球技，令佢特別受嗰一代球迷喜愛（一係就好憎佢），而佢喺祖國阿根廷國內嘅聲望更加係無與倫比，只要睇以下呢一件事就知道。


馬勒當拿近來再一次出任教練，佢帶領阿根廷甲組球隊甘拿斯亞 (Gimnasia) ，作客到紐維爾舊生（Newell's Old Boys）。佢喺當地酒店已經受到紐維爾舊生球迷英雄式歡迎，因為佢喺職業生涯尾二一間球會正正就係紐維爾舊生，雖然當年只為球隊上陣5場聯賽，但似乎球迷對佢念念不忘，畢竟得到呢位國家英雄效力已經足夠載入史冊。


去到比賽當日，紐維爾舊生繼續向呢位球王致敬，球會喺開波前準備歡迎儀式，向馬勒當拿送上一件印咗佢名嘅紐維爾舊生球衣、紀念品，更加搬出一張王座！




球王成場比賽坐喺呢張王座上面督師，型到不能形容，呢個場面出現喺紐維爾舊生主場比爾沙球場絕對係相映成趣，因為冠名呢個球場嘅傳奇教練比爾沙（Marcelo Bielsa）剛好係出名鍾意蹲坐喺一個冰桶／水箱上面指揮比賽。

結果就更加令球王滿意，因為佢麾下嘅甘拿斯亞最終以4－0擊敗紐維爾舊生，創下球會近23年來最大作客勝仗。事實上，馬勒當拿上任時，甘拿斯亞係聯賽榜尾球隊，開季5場只取得1和4負，球王上任後球隊唔算有太大起色（畢竟馬勒當拿執教生涯都未有成功經歷），仍然處於尾二位置，今次作客大勝聯賽榜中上游嘅紐維爾舊生，正好重振士氣。
另外，今日亦正好係馬勒當拿59歲生日，呢場比賽都算係一份大賀禮！

https://youtu.be/j3GwuRy9tb0
Source: Sportbible