難以置信！山形山神90秒內連入兩球中圈入波，門將做緊乜？

要喺職業比賽之中，未過半場或者啱啱過半場就射入，真係可遇不可求，碧咸嘅中場笠入已經成為經典，其他中場入球，例如朗尼、沙比阿朗素、查理阿當等，資深球迷都可以如數家珍。今個星期，日本聯賽就出現咗超罕見嘅情況，就係同一隊波、同一場比場，90秒內射入兩球未過半場嘅遠射！


10月27日下午，第38輪日乙比賽，山形山神於主場迎戰FC愛媛。上半場38分鐘，山形山神憑後衛柳貴博入波先開紀錄，領先1-0返回更衣室。「戲肉」於下半場出現，61分鐘，大軍壓上嘅FC愛媛喺對方半場猜波，點知自己猜失，「多謝都冇聲」嘅山形山神中場中村駿喺中圈旁邊輕鬆拎到個波，望一望前方，觀察到門將企位較出，隨即起腳施射笠入，將比數擴大至2-0。


不過，經驗老到、已經36歲嘅FC愛媛門將岡本昌弘竟然未有汲取教訓。約1分鐘之後，FC愛媛重覆犯錯，同樣「圍住嚟猜」之下失誤，今次輪到另一山形山神中場坂元達裕推順於中圈起腳，其實個波就射得唔靚，唔夠力笠死，去到禁區外已經落地，點知彈下彈下，照樣收死岡本昌弘，拍到都入，最終山形山神以3-0大勝FC愛媛。

https://streamable.com/5seuu
賽後，山形山神38場取得67分，排聯賽第2位，有機會取得直接升班資格，而FC愛媛就排第16位，暫時未有降班威脅。