摩連奴大談孤僻形象及曼聯時期:「我喺曼聯嘅成就被低估」

睇足365 於 02/08/2019 發表 收藏文章
前曼聯領隊摩連奴 (Jose Mourinho) 自從2018-19季中離開球隊後未有新工作,再次接受傳媒訪問時,就為自己抱不平。《Sky Sports》專訪摩連奴,呢位56歲名帥認為自己喺曼聯做得相當唔錯,又透露自己喺人前人後嘅性情。


摩連奴執教生涯三度執掌英超球隊,喺車路士取得成功,但去到曼聯就頗有爭議。事實上,若計算所有於英超領軍嘅比賽,摩連奴執教305場,勝率高達62%。喺執教超過100場英超嘅領隊中,只有哥迪奧拿及費格遜勝率比摩連奴高,喺「摩佬」之下嘅有文仙尼、高普、雲加等人。


「摩佬」經常被外間視為怪人一個,因為佢喺場內場外有完全唔同嘅表現,佢就咁回應:「呢個係我嘅問題,我係一個內向嘅人,當我工作嘅時候,我需要孤獨嘅感覺。足球領隊喺好多時候都係一個孤獨嘅人,孤獨地面對自己嘅感覺同想法、孤獨地做決定。你會有同事,但關鍵係做決定,只有一個人會負責做決定。

所以呢個形象係我嘅問題,因為我傾向將自己收收埋埋。同時,大家只會睇90分鐘內發生嘅事,只會睇到我喺球賽中嘅表現、我喺鏡頭前嘅表現。大家喺街上見到我時,都話『咦你真人睇落後生過上鏡喎、真人瘦過上鏡喎、真人高過上鏡喎』之類。所以,我諗係電視影響咗大家嘅觀感。

我就係我,我唔會做戲。我見過有啲人會扮嘢,我就唔會,所有嘢都係自然真實。當我坐喺後備席上冇慶祝入波,我唔係扮嘢,因為我當時正集中諗緊之後嘅事。我拎起啲水樽掉落地,係自然反應。踢水樽,都係自然反應。你哋見到嘅都係就係真正嘅我。如果有事情值得我笑,我就會笑。我鍾意笑,唔知點解。」


「摩佬」認為,即使只談論曼聯時期,佢仍然做得唔錯,首季已經帶領重建中嘅曼聯取得歐霸冠軍及英格蘭聯賽盃冠軍;第二季,曼聯亦取得英超亞軍,當季冠軍係幾乎無敵嘅曼城。

「我只可以話,喺曼聯嘅日子唔容易過。我一直認為拎到歐霸冠軍係一個美妙嘅成就,但外間就似乎唔係咁睇。

之後嘅英超亞軍係更大嘅成功,所以我當時嘅諗法大概係『Wow,我做得好幾好喎,我已經盡晒力,但得唔到應有嘅尊重』

我可以好肯定話你知,當我去到下一間球會,開始一個新project嘅時候,我會超級開心,帶住一個巨大嘅笑容行入去開記者會,我可以應承你。」

https://youtu.be/gVhS5TO927k
Source: Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→