又係巴塞舊將!神戶勝利船即將簽下華美倫

睇足365 於 26/07/2019 發表 收藏文章
日本球隊神戶勝利船與西甲豪門巴塞隆拿關係密切,自恩尼斯達加盟後,不斷同巴塞舊將拉上關係。最近,佢哋準備再一次簽入一名巴塞舊將,佢就係中堅華美倫。

loading

33歲嘅比利時國腳中堅華美倫,7月1日完成與巴塞隆拿嘅合約,成為自由身。華美倫效力阿仙奴時表現出色,但開始不斷遇上傷患,2014年轉投巴塞隆拿,同樣傷患不斷。加盟以嚟,佢共為巴塞隆拿各項賽事上陣53場。

根據西班牙及日本傳媒報導,J League球隊神戶勝利船即將簽下華美倫,後者已於神戶現身,與球會就合約條件談判。據報,神戶勝利船將於短期內作出官方宣布,與華美倫簽約至2021年。

loading

神戶勝利船陣中除擁有前德國國腳普度斯基,更有前巴塞球員恩尼斯達、大衛韋拿及沙治森柏。佢哋能夠引入多名「巴塞系」球員嘅原因,全因班主三木谷浩史。日本商人三木谷浩史係樂天集團創辦人兼主席,巴塞隆拿球衣胸口贊助商亦正正係樂天集團。

雖然星光熠熠,但神戶勝利船表現其實十分差勁,現時只喺J League排第15名,更高於降班區域3分。其中最令神戶頭痛嘅係失球數字,佢哋嘅入球數字達到20場入30球,事實上與榜首FC東京相同,但失球數字卻高達36球,比一眾護級球隊還要多。神戶勝利船近來所簽入大牌球星全屬中前場球員,相信今次希望引入華美倫統領防線,但仍需寄望華美倫保持健康。


Source: Marcafootballchannel.jp

留言


請按此登錄後留言。未成為會員? 立即註冊
    快捷鍵:←
    快捷鍵:→