升班馬錫菲聯破球會紀錄，簽般尼茅夫前鋒賴斯莫薩特

對於闊別頂級聯賽以久嘅升班馬嚟講，破球會轉會費紀錄嘅門檻好低，不過由於欠缺底蘊，升班馬花錢買人更應該小心審慎，否則貨不對辦，隨時落得降班兼破產收場。最近，英超升班馬錫菲聯以破球會紀錄轉會費，簽入般尼茅夫前鋒賴斯莫薩特 (Lys Mousset) ，到底佢可唔可以幫到錫菲聯呢？


英超升班馬錫菲聯官方宣布，已經從般尼茅夫簽下23歲前鋒賴斯莫薩特，錫菲聯主帥基斯禾達 (Chris Wilder) 表示：「賴斯莫薩特體型強壯、有速度，能夠為我哋帶嚟與現有陣容唔同嘅進攻威脅。

我相信佢會好適合我哋，而且佢喺有其他選擇之下，仍然揀咗我哋，亦顯示佢有野心接受挑戰。」


根據《Sky Sports》報導，賴斯莫薩特嘅轉會費將會超過1000萬英鎊，打破錫菲聯球會紀錄；呢項紀錄最近先由卡林羅賓遜 (Callum Robinson) 打破，此子今個月12日由普雷斯頓加盟，花費702萬鎊，司職左翼鋒。

賴斯莫薩特2016年由勒哈弗爾加盟般尼芧夫，但司職正前鋒嘅佢，加盟以嚟各項賽事上陣71場，主要後備上陣，場均上陣30分鐘，合共只錄得5入球1助攻，三年嚟仍未能於英超獲得穩定上陣機會，今次加盟錫菲聯相信係佢爭取正選證明自己嘅好機會。

Source: Sky Sports