加利韋特93日棄港隊教日乙，今被東京綠茵解僱

前香港足球代表隊主教練加利韋特 (Gary White) 去年9月執掌港隊，僅上任93日就請辭，「跳槽」到日本聯賽發展，令球迷嘩然。七個月後嘅今日，佢已經被東京綠茵解僱。


45歲、來自英國嘅加利韋特，擔任香港隊主帥前曾經執教英屬處女島、巴哈馬、關島及中華台北四支代表隊，以及上海申鑫。雖然佢正式上任前，曾有人質疑佢係唔係可以長遠幫助香港隊發展，還是只係擅長提升國際排名，但未能實質上提升球隊戰力及長遠發展。不過，加利韋特上任後，評價普遍係正面觀望。正當香港球迷仍期待港隊喺佢麾下有何進步時，加利韋特突然於12月請辭，其時只執教咗93日。

加利韋特嘅新東家係J2球會東京綠茵 (東京ヴェルディ) ，當時有香港傳媒報導認為，日本球會更能吸引加利韋特嘅原因，主要係家庭因素，因為佢當年於日本報考教練牌照期間認識現時的妻子，此後太太及兒子一直於東京生活。

東京綠茵於2018球季升班附加賽決賽不敵J1第16名球隊磐田山葉，無緣升班。加利韋特表示上任後首要目標係帶領球隊於2019球季後升上J1。

七個月後，東京綠茵於J2已賽22場，只取得7勝8和7負，以29分排第13位，距離榜首11分。上星期三，東京綠茵出戰天皇盃次圈，雖然僅派副選出戰，但竟以0-2不敵大學球隊法政大學，加上現時聯賽成績未如理想，球會最終決定解僱加利韋特，由幾日前先考獲日本國內S級教練執照嘅青年軍教練兼球隊名宿永井秀樹接手，暫代帥位至季尾。

Source: footballchannel.jp、verdy.co.jp、jleague.jp