《Sky Sports》:迪列特選擇加盟祖雲達斯,勢成球會第二高薪球員

睇足365 於 23/06/2019 發表 收藏文章
阿積士年輕隊長迪列特 (Matthijs de Ligt) 今個夏天成為轉會市場上嘅當紅炸子雞,爭奪佢嘅全部係歐洲大球會,最近有報導認為佢已經選定下一站目的地。

loading

《Sky Sports》報導,19歲荷蘭國腳迪列特,已經選擇加盟意甲班霸祖雲達斯。報導指出,喺幾名主要爭奪者中,祖雲達斯已壓過巴黎聖日耳門及巴塞隆拿,成為迪列特嘅首選。不過,祖雲達斯仍未與迪列特一方就個人條件達成共識。

消息指,祖雲達斯將會支付6200萬鎊轉會費予阿積士,以帶走呢位年輕隊長。個人條件方面,迪列特一方由著名經理人拉奧拿 (Mino Raiola) 主理,佢要求祖雲達斯開出一份價值1070萬年薪嘅合約,外加各種獎金。如果呢一份合約成事的話,迪列特將會成為班馬軍團內僅次於C朗拿度嘅高薪球員。

據較早前相關報導,迪列特一度傾向加盟巴塞隆拿,與阿積士隊友法蘭基迪莊再度合作,但其經理人拉奧拿因為佣金問題,希望將佢帶到其他聯賽,直至近期以祖雲達斯及巴黎聖日耳門呼聲較高。

早前歐洲國家聯賽決賽後,效力祖雲達斯嘅葡萄牙球星C朗拿度被拍攝到與迪列特交談,迪列特後來承認C朗邀請佢加盟祖雲達斯,但當時只有比賽落敗嘅情緒,一時未能反應。

loading

loading

Source: Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→