曼聯5000萬鎊求購雲比沙加遭拒，韋斯咸中堅迪奧普底價6000萬鎊

英超球隊曼聯打算於今個夏天購入多名球員提升陣容活力，特別係於後防位置上，報導指曼聯已鎖定水晶宮右閘雲比沙加及韋斯咸中堅迪奧普，兩人都並非超級球星，但有足夠潛力，令曼聯可能需要付出超過1.1億英鎊將兩人收歸旗下。

根據《Sky Sports》報導，曼聯早前已被水晶宮拒絕一份4000萬鎊報價，最近再將對雲比沙加嘅報價提高至價值5000萬鎊，但仍遭到拒絕。


報導指，21歲嘅雲比沙加今季於英超大放異彩，前途無可限量，加上其英人身份，令佢嘅轉會價值水漲船高，但雲比沙加本人未有急於轉會，從未提出轉會要求，而且同球會尚有三年合約在身，種種因素令水晶宮並冇任何放人壓力，可以靜待合適報價。報導又表示，水晶宮今次拒絕曼聯嘅原因，係不滿曼聯提出3500萬鎊初始轉會費加1500萬鎊附加條款嘅形式，如曼聯改為直接支付4500萬至5000萬鎊轉會費，水晶宮將會接受交易。


另一方面，曼聯另一目標、韋斯咸中堅迪奧普，則叫價更高。《Sky Sports》報導，韋斯咸基本上將呢位22歲法國中堅訂為非賣品，更與球會有4年合約在身，因此並冇興趣聆聽任何價值低於6000萬鎊嘅報價。報導認為，曼聯與韋斯咸曾商討以4500萬鎊加一位球員換取迪奧普，交換球員嘅部分由韋斯咸提出，但曼聯不願將該名球員送到其他英超球隊。《Sky Sports》稱，引述迪奧普身邊消息人士說法，迪奧普已成為候選法國大國腳，更受到巴黎聖日耳門及巴塞隆拿密切注視。


現今好中堅難求，盛傳為曼聯目標嘅高列巴尼 (Kalidou Koulibaly) 估計轉會費高達1億鎊，而英格蘭中堅麥佳亞 (Harry Maguire) 亦需要8000萬鎊。因此，如曼聯下定決心喺後防多個位置上補充，預料需準備過億鎊轉會費。

Source: Sky Sports
https://www.skysports.com/football/news/11667/11743571/manchester-uniteds-50m-bid-for-aaron-wan-bissaka-rejected-by-crystal-palace
https://www.skysports.com/football/news/11095/11743498/west-ham-willing-to-sell-diop-for-60m