【官方宣布】皇馬挖角成功，簽下「日本美斯」久保建英

日本向來多年輕球員外流，久保建英於2011年就加入巴塞隆拿U11青年隊，被寄予厚望，更因為腳法出眾而獲得「日本美斯」之稱，但佢喺回國發展後，將會加盟皇家馬德里。


皇家馬德里今日於官方網站上宣布，已經簽入前巴塞青訓出品久保建英 (KUBO Takefusa)，呢位剛滿18歲嘅明日之星，將會先代表皇馬B隊 Castilla 出賽。


久保建英於2015年離開巴塞，返回日本落班，據了解係因為當時巴塞被FIFA裁定違反簽入18歲以下球員嘅規則，令久保建英無法再於巴塞青年軍上陣。年僅15歲，久保建英已經為FC東京上演J League首戰。2019球季久保建英已經係FC東京常規正選，各項賽事上陣36場射入7球，佢喺6月4日先年滿18歲。


今個月，久保建英亦上演咗日本大國腳處子戰，以2-0擊敗薩爾瓦多。現時，佢正隨隊參加2019美洲盃。



皇馬陣中並非只得久保建英一名日本球員，日本新一代雙星中嘅另一人，15歲嘅中井卓大 (NAKAI Takuhiro) 正係效力於皇馬青訓，佢由9歲受訓至今，潛力不容忽視。