若沙利赴祖雲達斯，車路士將正式接觸打比郡邀林柏特回巢

車路士領隊沙利近日盛傳將會前往祖雲達斯出任主帥一職，雖然早前《Sky Sports》曾報導指車路士會方將唔會阻止沙利離開，但近期事情仍未有進一步發展，估計仍有談判進行中。


根據《Sky Sports》最新報導，車路士仍然同祖雲達斯就沙利嘅離隊賠償金額進行談判。車路士希望向祖雲達斯索取沙利餘下一年價值530萬鎊合約中，大部分嘅金額作為賠償金，但祖雲達斯正努力遊說車路士放棄收取賠償。

另一方面，外間有傳聞指，車路士將會邀請前隊長林柏特回巢出任領隊一職，《Sky Sports》報導就指，林柏特現時執教嘅打比郡並未收到任何正式接洽，但《Sky Sports》表示一旦車路士同祖雲達斯就沙利一事達成協議，車路士就會向打比郡正式提出要求與林柏特展開談判。

林柏特今季展開領隊生涯，帶領英冠球隊打比郡力爭升班。林柏特於升班附加賽中不敵阿士東維拉後，稱將會與球會商討去留問題，但佢又向傳媒表示，對目前嘅傳聞不感興趣。如林柏特取代沙利成為車路士主帥的話，將會成為藍軍於班主阿巴莫域治時代，16年來第12位領隊。