巴西點兵戰美洲盃,法賓奴、盧卡斯摩拉季尾fit爆仍落選

睇足365 於 18/05/2019 發表 收藏文章
巴西國家隊將會喺6月出戰熱身賽及2019美洲國家盃決賽周,巴西主帥迪堤最近公布23人決選名單,球員名單包括大部分熟悉的面孔,以及部分後起之秀。


大部分主流聯賽已經進入尾聲或準備放暑假,而2019美洲國家盃亦會喺6月開始進行分組賽。今屆美洲國家盃邀請日本及卡塔爾兩支亞洲足協球隊參戰,與另外10支美洲球隊,分成3組,巴西國家隊被分入A組,與玻利維亞、委內瑞拉及秘魯同組。巴西會先於6月5日、9日與卡塔爾及洪都拉斯進行友誼賽,然後於14日、18日及22日進行分組賽。

巴西貴為今屆美洲國家盃主辦國,於主場出擊,主帥迪堤最近公布23人決選名單。門將方面,仍舊係利物浦門將艾利臣及曼城門將艾達臣,加上只有一次國家隊經驗嘅31歲哥連泰斯門將卡沙奧 (Cássio) 。後衛方面,熟悉嘅面孔包括有丹尼爾艾維斯、泰亞高施華、米蘭達、馬昆奴斯、菲臘比路爾斯等,已被皇馬簽入嘅21歲新星米列達奧 (Éder Militão) 仍有入選。

loading


中場方面,巴西沿用卡斯米路、費蘭甸奴、古天奴等球星,另有巴塞中場艾法美路、AC米蘭中場柏基達兩名年輕球員入選,最近轉籍代表巴西嘅拿玻里中場阿蘭亦被徵召。

前線方面,繼續選用尼馬、費明奴及加比爾捷西斯,愛華頓翼鋒李察利臣表現出色亦獲徵召,仲有甘美奧翼鋒艾華頓 (Everton) 及阿積士翼鋒大衛尼利斯 (David Neres) 。

loading


有人歡喜有人愁,球季下半段於利物浦表現出色嘅法賓奴,交出代表作協助球隊反勝巴塞隆拿,仍然未能入選,反而曼城老將費蘭甸奴因為於世界盃犯錯,曾經表示因為家人備受壓力及侮辱而唔再代表國家隊,卻反而獲得重召。熱刺嘅盧卡斯摩拉今季各項賽事射入15球,更於歐聯四強大演帽子戲法,助球隊殺入決賽,可惜亦要落選。其他落選嘅著名球員包括馬些路、韋利安、杜格拉斯哥斯達等。

Source: Sky SportsWiki

留言


請按此登錄後留言。未成為會員? 立即註冊
    快捷鍵:←
    快捷鍵:→