科特迪瓦球星耶耶托尼嘅經理人 Dimitri Seluk 一向喜歡亂嗡，經典嘅「生日蛋糕」事件正係出自經理人之口，去年加盟希臘球隊奧林比亞高斯前，呢位經理人又走出嚟話耶耶托尼已經喺倫敦完成體測，見到大家估緊邊間倫敦球會簽耶耶托尼時， Dimitri Seluk 繼續話唔係升班馬富咸，結果可能耶耶托尼只係喺倫敦完成奧林比亞高斯嘅體測，大家俾經理人過咗一棟，而佢嘅其他事跡亦多到數唔晒。
最近佢又再次發功，5月10日，Dimitri Seluk 喺自己Twitter上連出多個post，談論耶耶托尼已經決定掛靴，仲話耶耶托尼將會成為教練，轉發咗一條新聞連結，內文係話耶耶托尼會喺俄羅斯教波。
其實當時已經有球迷感到懷疑，俄羅斯足球一向存在嚴重種族歧視問題，對黑人球員嚟講係一個特別苛刻嘅環境，黑人主帥喺歐洲球壇尚且唔多，加上連英格蘭都一直有黑人教練稱因膚色而不受信任，耶耶托尼要喺俄羅斯做教練真係難上加難。經理人係球員嘅代言人，因此雖然傳媒同球迷已經多番中伏，仍然因為 Dimitri Seluk 嘅說話而大肆報導耶耶托尼掛靴嘅消息，但原來耶耶托尼並冇親口講過。
喺5月12日，耶耶托尼個人官方Twitter澄清，話其實自己仲想踢多幾年波，佢的確正為教練工作做準備，但暫時冇打算退出職業足球去全職教波，更強調到退役嘅時候，會「自己」「親口」宣布退役，咁先算數喎。
事件尚未完結，因為喺幾日後，就有英國傳媒報導，話耶耶托尼將會前往中國發展，但36歲嘅佢唔係踢中超，而係踢次一級嘅中甲。不過暫時只有公信力欠奉嘅《Daily Mail》及《The Sun》報導呢個傳聞。
另一邊廂，中國傳媒報導，耶耶托尼喺5月16日現時於青海機場，更「有圖有真相」，影到耶耶托尼喺一個機場內，為嘅唔係飲青島，而係踢青島，報導指中甲榜首球隊青島黃海青港誠意邀請耶耶托尼到球隊試腳及傾談條件。
可惜有圖未必有真相，因為呢張相片中，其實未能清晰顯示耶耶托尼所在地，只可以見到周圍的確係清一色亞洲人，相信要出動梁國雄議員先可以搵到係唔係中國嘅機場。另一方面，著名中國足球媒體《足球報》官方微博就表示，耶耶托尼的確有意加盟青島球隊 (但恕筆者並不熟悉《足球報》公信力如何)。
仲有一個版本嘅傳言，係耶耶托尼的確打算退役，但喺收到中甲球會開出初步條件後收回決定，咁真相就只有耶耶托尼同佢經理人知道。
Source: BBC、DailyMail 、網易體育、新浪體育
請按此登錄後留言。未成為會員? 立即註冊