盛情難卻? 曾掟嘢嬲住走,納比僅離任三個月即重掌中國隊帥印

睇足365 於 04/05/2019 發表 收藏文章
「13億人點解搵唔到11個好波?」呢條問題確實切中中國足球要害,筆者唔打算用嘲笑角度睇中國隊嘅情況,因為香港隊雖然曾經逼和中國隊,睇到人熱血沸騰,但拙見認為香港冇資格自滿同嘲笑人,人口少過將軍澳嘅冰島已經喺世界球壇闖出名堂,作為一個富裕嘅700萬人城市,香港嘅目光應該放得更遠,標準要定得更高,所以香港其實都需要思考「700萬人點解搵唔到11個好波?」。


純粹從足球角度睇,原因不外乎係足球人口不足、球市、資源、組織管理問題,但喺中國大陸,相信前三項都唔係主因,剩低嘅就係組織管理問題 (當然呢一切一切其實都同政治、文化有關,但不在本文討論範圍)。中國足球嘅失誤經驗話俾我哋聽,假使香港足球有一日有無限金錢,都一定要避免朝令夕改、急功近利,睇下中國隊就知……

2019年1月25日,中國足球代表隊出戰2019亞洲盃八強,面對亞洲勁旅伊朗,雖然伊朗曾經於2018世界盃分組賽擊敗摩洛哥、逼和葡萄牙及以一球僅負於西班牙,實力明顯高於中國隊,但中國今仗以三個驚人後防犯錯慘敗,令主帥納比 (Marcello Lippi) 震怒。當時佢喺下半場補時階段已提早返回更衣室。多間中國傳媒報導,指納比半場休息時已於更衣室大發雷霆及怒擲物件發洩,全完場後又因激動地批評球員表現,導致喺賽後記者會上聲線沙啞。


納比於賽後宣布已經完成同中國足協嘅合約,表示自己已盡最大努力去令中國隊成長,又感謝中國球迷支持,最後向在場記者道別。同時,佢喺記者會上拒絕感謝中國球員。

事後,中國足協委任廣州恆大主教練簡拿華路(Fabio Cannavaro)出任中國集訓隊主教練,帶領中國集訓隊出戰中國盃,但兩戰全敗,更被區內牌面實力較遜嘅泰國隊輕鬆擊敗。最終,「大簡」表示未能兼顧球會與國家隊工作,主動放棄競逐中國隊主帥一職。

最近,綜合《新浪》、《網易》及《懂球帝》報導,中國已經成功邀請納比再次執教中國隊,待遇遠超以往 (《新浪體育》稱納比首次執教時年薪估計已高達2000萬歐元) ,而且中方同意納比開出嘅所有條件,其中包括固定將未來所有主場賽事安排於廣州進行,更有指今次談判係由高於中國足協嘅管理部門主理。任期方面,暫時有兩個版本,中國傳媒指納比己簽下一份4年合約,至2023亞洲盃完結,但意大利《天空體育》就指出納比合約只有一年「死約」,按即將展開嘅2022世界盃外圍賽成績決定延長與否。

管理階層思維如此幼稚,你仲想呢個國家嘅足球發展到咩程度?死攬住一個名帥唔放就以為有好結果,一個國家嘅足球發展,從來係一個以十年計嘅長遠計劃,由足球政策、青訓、配套、市場,以至草根足球教練/ 球員培訓,環環相扣 (呢個道理似乎香港足球管理階層同樣唔明白)。中超每年一變嘅「U23政策」更已成為笑話,中超球隊大連一方可以為咗「應酬」必須派出U23球員嘅規則,喺補時階段將U23球員楊芳志「彈出彈入」,換入95秒後馬上換走,你話扭曲到咩地步?年輕球員點諗?所以,「13億人點解搵唔到11個好波?」其實好易答,如此類推「700萬人點解搵唔到11個好波?」,心裡有數,在位者問點解交唔出成績時,就要問返自己喇。


一間中國球會嘅前董事長(中國富豪),就咁樣講,你話有冇道理? (但又其實,球會高層點會可以置身事外呢……)

Source: 新浪網易懂球帝SkySports

留言


請按此登錄後留言。未成為會員? 立即註冊
    快捷鍵:←
    快捷鍵:→