保頓被車路士借將踢落英甲 譚美阿巴咸單季入25個聯賽入球破維拉紀錄

睇足365 於 20/04/2019 發表 收藏文章
有唔少英格蘭老牌球會喺頂級聯賽降班之後,從此一蹶不振,喺英冠、英甲,甚至英乙「流連」,今季英冠仍有唔少熟悉嘅名字出現喺聯賽榜下半版,例如諾定咸森林、布力般流浪、伯明翰、雷丁、韋根、昆士柏流浪、保頓等,連上季先由英超降班嘅史篤城,都只係排第16位。

loading

今場比賽兩隊主角同樣係球迷十分熟悉嘅老牌球會,保頓主場對阿士東維拉,不過兩支球隊今季嘅命運就截然不同,保頓喺護級區苦苦掙扎,阿士東維拉就力爭升班資格。

今仗47分鐘,由車路士外借嘅21歲前鋒譚美阿巴咸 (Tammy Abraham) 傳中助攻俾「維拉周柏豪」基亞利殊頭槌頂入,令阿士東維拉領先1-0。戰至57分鐘,輪到基亞利殊投桃報李,傳中俾譚美阿巴咸插水式頭槌頂入,奠定2-0勝局。

可惜,譚美阿巴咸因為呢個入球而最終因傷被過離場,維拉領隊甸恩史密夫(Dean Smith)賽後就透露,阿巴咸入波時整親肩部,傷勢唔重,但下仗亦要休息。

loading


加上呢個入波,譚美阿巴咸今季已經為維拉攻入25個聯賽入球,成為繼自1977年安迪格雷 (Andy Gray) 以來,首位單季取得25個聯賽入球的維拉球員。譚美阿巴咸今場更錄得一傳一射,上陣36場聯賽已累積25入球3助攻,效率極高。

loading

至於保頓,佢哋賽後至以32分排喺聯賽尾二,已肯定護級無望,下季要喺英甲見。保頓曾經連續由2001-02到2010-11球季征戰英超,得到 JJ奧高查、安歷卡等名將效力,但自2012-13球季喺英冠出現以嚟,就只有該季排第7位,最接近升班附加賽席位,此後一直沉淪,2016-17球季更要喺英甲作賽,上季重返英冠又只係僅僅護級成功。

loading

比賽精華

https://streamable.com/rd7lh

留言


請按此登錄後留言。未成為會員? 立即註冊
    快捷鍵:←
    快捷鍵:→