【作客擺烏龍】德國法蘭克福有兩個，賓菲加球迷「不幸」去錯

仲記得一年前有中國球迷想去日本睇J League勁旅鹿島鹿角對上海上港嘅亞冠比賽，竟然「望文生義」，以為鹿島鹿角嘅主場係喺鹿兒島，個名又的確係幾似嘅，但可惜鹿島鹿角嘅主場其實係喺日本東部茨城縣鹿嶋市，由於西部嘅佐賀縣已經有鹿島市，所以用上「島」嘅異體字「嶋」，總之兩個名字意義相同嘅地方都唔喺鹿兒島啦。所以話，做死忠球迷隨隊作客出國，真係要做足資料搜集，如果唔係不但鬧出笑話兼浪費金錢，最慘係錯過場比賽呀！


作客球迷擺烏龍事件，啱啱竟然發生咗歐洲版，話說喺歐霸八強次回合，葡超賓菲加作客大鬥德甲法蘭克福，有一啲賓菲加球迷諗住親身去到德國嘅法蘭克福睇波，佢哋由葡萄牙里斯本出發「自駕遊」，仲好興奮咁全程喺Instagram上打卡，點知就被發現擺咗個大烏龍。

一位外國記者首先喺Twitter上面轉載呢班球迷嘅故事，cap低咗佢哋啲打卡相，不過相信佢cap出嚟時已經嘗試提醒球迷，但都係救佢哋唔到。

出post呢位記者叫Alex Truica，佢cap到呢幾位球迷透過google map規劃行車路線，目的地的的確確係叫法蘭克福 (Frankfurt)，的的確確係喺德國，車程有成16.5個小時咁長，下一張圖仲影到路牌寫明去法蘭克福，實冇死啦。


點知就中大伏囉，原因德國有兩個城市係叫法蘭克福，一個喺東部，一個喺西部，兩個法蘭克福之間相距6小時車程。記者表示呢個時候已經send咗message俾呢個打卡嘅球迷，希望佢快啲知道自己去錯地方啦。


根據維基百科資料顯示，大家比較常聽到嘅法蘭克福，亦即係德甲球會法蘭克福 (Eintracht Frankfurt) 所在地，正式全名其實係叫 Frankfurt am Main ，即係美茵河畔法蘭克福，係位於德國中西部嘅大城市。至於呢幾位球迷去咗地方，正式全名就叫做 Frankfurt an der Oder 奧得河畔法蘭克福，係喺德國東部一個只有不足6萬人口嘅小城市。其實上面嘅路牌已經見到端倪，上面寫住Frankfurt (Oder) ，而唔係Frankfurt (Main) 。



之後，球迷終於發現自己去錯地方。可能由於呢位記者cap圖時cap埋球迷個Ig名，所以嗰位球迷之後都話收到大家訊息「轟炸」佢，關心佢嘅去向，相信當時佢哋已經趕緊去美茵河畔法蘭克福，希望趕得切睇波。


最終，佢哋喺柏林打卡「報平安」，話「起碼我哋到咗柏林」，記者相信佢哋最終認為趕唔切去返西面，所以喺較近嘅柏林停低，搵酒吧睇波。



唔知入唔到場係好事定壞事，因為賓菲加最終喺爭議判決之下，以0-2不敵主隊，總比數4-4因對手有作客入球優勢而出局。



全場精華

https://streamable.com/0fh4j