醜！PSG連續三場不勝，杜曹：「我都撐唔落」

對於法甲班霸巴黎聖日耳門嚟講，喺國內聯賽屈機已經係最基本要求，佢哋一直喺歐聯拎唔到好成績，更係為人詬病。PSG今屆已經喺歐聯出局，法國聯賽盃又無緣決賽，可以話幾令人失望。當然，PSG拎法甲冠軍只係時間問題，但佢哋最近連續三場不勝，又唔係要留力歐聯，都幾肉酸下。


4月8日，PSG主場對斯特拉斯堡，後者呢隊「超級升班馬」非但完全不受降班威脅，現時更高據聯賽第9位，早前已奪得法國聯賽盃冠軍，PSG派出後備前鋒卓普莫亭，佢既攻入一球，又不慎喺門前阻擋隊友必入球，最終踢成2-2。4月15日，PSG作客里爾，早段已經擺烏龍落後，其後一度扳平1-1，但後防穿窿，令入球功臣祖安巴尼特侵犯單刀球員被逐，十人應戰之下，PSG以1-5慘敗。


PSG今仗作客到南特，事實上主帥杜曹上仗賽後已「戴頭盔」，指難以擊敗南特，全因球隊受到傷兵問題困擾，泰亞高施華、馬昆奴斯、迪馬利亞、卡雲尼、尼馬等主將悉數因傷缺陣，今仗更唔可以用盡後備席名額，只能放上5名後備球員。問題係，PSG作為豪門球會，今仗對中下游嘅南特，派出保方、丹尼爾艾維斯、古沙華、甘彭比、泰路基拿、達斯拿等球員，真係可以作為輸波藉口？咁大間球會連見得人嘅青訓都唔夠，連後備席都坐唔滿？


開賽19分鐘，丹尼爾艾維斯遠射世界波先開紀錄，但防守鬆散，完半場前已被反超前。下半場，南特再由迪亞高卡路士把握角球混亂射成3-1，PSG只可以靠首次法甲上陣嘅古高追成3-2完場。

賽後，PSG主帥杜曹都表示：「我永遠都嘗試為我嘅球員辯護，但今日真係冇可能。」杜曹又話，球隊今日可以話係毫無表現，冇可能取勝，認為球隊心態上出現問題，更直言球員應慶幸冇輸多幾球。


PSG仍然喺聯賽榜上拋開17分，只要下場返到主場對摩納哥不敗就可以提早奪冠，或者呢個係PSG嘅如意算盤啦……

比賽精華
https://hlfc.veuclips.com/embed/UoYhFr9bJI?autoplay=1&htmlplayer=1
Source: Goal