【日本雙星之一】皇馬15歲日本神童射入世界波技驚四座

日本年青球員人才輩出，早前已經有「日本美斯」久保建英 (Takefusa Kubo) 效力巴塞隆拿青年軍，久保建英表現雖然十分出色，但後來因為巴塞隆拿違反FIFA有關簽入18歲以下球員嘅規例，而唔可以再為巴塞上陣比賽，於是已經返回日本，今年17歲嘅佢由FC東京外借效力J League橫濱水手。


不過，日本球迷唔需要失望，日本仲有一位喺西甲豪門靜待上位嘅超級新星，佢係經常被拎嚟同久保建英相提並論嘅中井卓大 (Takuhiro Nakai) ，15歲嘅佢正效力皇家馬德里青年軍，絕對係同代日本年青球員中嘅代表人物。


中井卓大早於9歲已經加入皇馬青訓營，能夠留效至今，天分、努力同適應能力缺一不可，佢最近再一次提醒廣大球迷，自己喺未來將會挑戰皇馬一隊席位。早前喺一場U16比賽中，中井卓大代表皇馬青年軍A隊正上陣，喺下半場開賽冇耐，中井卓大中路盤球突破，突施冷箭，皮球直飛左上角入網，呢個世界波幫助皇馬最終以3-0擊敗拉斯羅薩斯 (Las Rozas) 。


司職中場嘅中井卓大喺皇馬青年軍陣中外號 "Pipi" ，以盤扭技術見稱，網上已經可以搵到唔少佢嘅精彩片段。

https://i.imgur.com/Ku88Ohs.gif
https://i.imgur.com/LOTsSY3.gif
有別於一般日本球員，中井卓大因為自細喺西班牙長大，可能對佢發育有正面影響，佢今年15歲，但官方資料顯示身高已經有1.76米、重59.6公斤，明顯比效力艾拉維斯嘅大前輩乾貴士高半個頭，亦高過大兩歲嘅久保建英。