希古恩宣布退出國家隊：「人們總是記得我射失的，而不是射入的」

效力車路士嘅阿根廷前鋒希古恩，僅以31歲之齡，就宣布退出國家隊，佢表示呢個決定係為咗得到更多時間陪伴家人，又坦言多年嚟受到嘅批評令佢覺得受傷害。


希古恩喺AC米蘭嘅租借生涯提早結束，祖雲達斯改為將佢外借到英超車路士，加盟以嚟上陣10場射入3球。國家隊方面，希古恩上陣75場射入31球。

希古恩曾經同阿根廷進入三項大賽決賽，分別係2014世界盃、2015及2016美洲國家盃，三次都飲恨而回，阿根廷自此被戲稱「亞軍廷」，佢喺世界盃決賽對德國時單刀射斜，又喺2015美洲國家盃決賽失機兼12碼宴客，被直指為國家隊罪人。

https://i.imgur.com/pVAMrpL.gif
受盡批評，希古恩坦言受到傷害：「啲人只係記得我射失嘅機會，忘記咗我射入嘅入波，我肯定自己喺2014世界盃對比利時射入致勝入球時，大家都好興奮。

當你無情咁批評人嘅時候，好多人會受傷。我見到我嘅家人有幾難受，但我已為國家隊付出所有。

國家隊未有達到我哋嘅目標係一回事，但談論失敗係好痛苦。」


另外，希古恩又話，退出國家隊係因為想花更多時間陪伴家人，同時認為自己已經將一切奉獻俾國家隊，仲話會專心為車路士踢波。

Source: BBC