國際友誼賽殺人攔截又一單　紐卡素中場輸波踩後腳直紅兼引衝突

由睇足365 於 28/03/2019 發表收藏文章

最近國際賽期，大部分國家隊都會進行國際賽，其中有部分賽事只屬友誼賽性質，「FIFA」病毒令球會教練頭痛，教練特別唔希望球員喺呢啲完全冇競爭意味嘅比賽中「為國捐軀」，不過今個國際賽期，已經最少發生第三宗友誼賽不必要地兇狠攔截嘅情況，令人膽顫心驚。

早前，筆者已經寫過《【絕非首次】塞爾維亞前鋒施展收山腳被逐，鐵人辛尼腳踝硬食險斷腳幸無礙》以及《中國隊中國盃包艇兼輸品　韋世豪收山腳令對手重傷，中國網民都鬧：「丟臉！」》兩次於今個國際賽期內發生嘅類似事件，原來最近喺美洲亦有同類事件。

噚日，墨西哥喺主場同巴拉圭進行友賽，墨西哥早早已經領先到3-1，巴拉圭嘅紐卡素中場米基爾阿米朗 (Miguel Almiron) 唔知係唔係輸到躁，喺63分鐘，佢從後攔截墨西哥中場荷西華斯基斯 (José Juan Vázquez) ，睇返慢鏡，佢竟然一腳踩落荷西華斯基斯嘅膝蓋後方位置，大家都知，呢個位置完全冇裝備保護，被鞋釘踩中真係痛入心扉，呢個動作真係非常陰濕。