拜仁宣布8000萬歐元簽盧卡斯靴南迪斯,下季已預簽兩名法國年輕後防

睇足365 於 28/03/2019 發表 收藏文章
德甲班霸拜仁慕尼黑官方正式宣布,已經由馬德里體育會簽下後衛盧卡斯靴南迪斯(Lucas Hernandez),球員將會喺7月1日正式加盟。

盧卡斯靴南迪斯加盟拜仁慕尼黑嘅消息,喺過去幾個月內已經多次傳出,但拜仁官方直至周三先正式宣布落實轉會,拜仁向馬體會支付8,000萬歐元轉會費,打破球會史上最高轉會費紀錄,同呢位法國後衛簽下5年合約。馬體會方面證實,8,000萬歐元係盧卡斯靴南迪斯合約上嘅解約金額。

loading

23歲嘅法國後衛盧卡斯靴南迪斯於馬體會出道,去年於2018世界盃上擔任法國國家隊左閘,協助球隊贏得世界盃。佢可以出任左閘或中堅位置,出道以嚟為馬體會上陣110場,今季因為膝部受傷而長時間休戰,只上陣14場聯賽,不過佢已經喺今個國際賽期內完成拜仁體測,拜仁相信佢喺新球季開始時可以為球隊上陣。

loading

拜仁體育總監沙歷咸美斯表示,為球會簽入世上其中一位最出色嘅防守球員而感到高興,認為佢將會延續拜仁陣中擁有出色法國球員嘅傳統。

除咗盧卡斯靴南迪斯,拜仁早於一月已宣布簽下柏華特 (Benjamin Pavard) ,呢位同樣23歲嘅法國國腳後衛,世界盃時出任右閘並射入一球世界波,佢喺球會主要擔任中堅,下季正式加盟時將會同盧卡斯靴南迪斯再度合作。

loading

現有陣容上,拜仁於左閘位置只有阿拉巴一人,右閘上有拉芬拿預計將於季尾自由身離隊,甘美治同時可出任中場;中堅方面,蘇利應為拜仁栽培對象,因此預料謝路美保定及侯姆斯兩位老大哥中,最少一位會因為兩名法國新星加盟而減少上陣時間。

Source: GoalFCBayern

留言


請按此登錄後留言。未成為會員? 立即註冊
    快捷鍵:←
    快捷鍵:→