【下次要碌埋一邊】門前失機坐地瞬間，布倫瑞克翼鋒慘變「中堅賓」

講到「擋走」隊友必入球，近年最經典應該當年阿仙奴前鋒賓特拿喺對手門前擋走隊友法比加斯嘅射門，自此令佢獲得「中堅賓」稱號。最近，德國同樣發生咗隊友擋波事件，不過相較於「Lord賓」為增加球賽挑戰性而無私拯救對手嘅舉動（曲），以下呢位仁兄就無辜得多。


早前一場德丙賽事，布倫瑞克（Eintracht Braunschweig）主場對梅彭（Meppen），主隊布倫瑞克急需搶分護級，佢哋最終順利以3-0擊潰位處中游嘅梅彭，但隊中翼鋒贊沙（Manuel Janzer）就不幸成位主角，令呢場德丙賽事受到前所未有嘅關注。


比賽39分鐘，當時雙方仍然踼成0-0，布倫瑞克翼鋒贊沙接應隊友巴亞（Marcel Bär）右路傳中，搶點起腳中柱彈出，佢坐喺龍門口驚魂未定，似乎對於自己門前失機感到失望及難以置信。

https://i.imgur.com/rK1yE5l.gif

點知呢個只係故事嘅一半，正當贊沙慢慢準備起返身之際，布倫瑞克隊長中場費斯拿（Stephan Fürstner）後上補射空門，眼看已經冇對方守衛可以阻擋入球，可惜算漏一人，個波省中贊沙慢溜出界。
https://i.imgur.com/KCH4Zjd.gif

雖然話做球員就不嬲都唔好攻完唔入就停低擺甫士，應該第一時間去追波補射或逼搶，不過老實講贊沙呢一下真係冇坐喺原地太耐，只係起身唔夠快，同埋個波嚟得太快。可能下次遇到呢種情況，要極速碌走先得安全⋯⋯

比賽精華
https://www.youtube.com/watch?v=ribR30PN4Lo