世紀難題C朗美斯二揀一 泰利完美拆解;A高:「美斯難mark啲,雖然佢未入過我波」

睇足365 於 08/02/2019 發表 收藏文章
呢個年代球壇兩大人物,美斯同C朗拿度邊個更偉大,一直係球迷爭議激烈嘅話題,佢哋兩人壟斷十年金球獎,每人各贏五次,兩人代表著截然不同嘅足球風格、性格,唔同價值觀嘅球迷自然各有喜好。近日,兩位前車路士名將先後大談呢個話題。


前車路士隊長泰利最近喺社交網絡上回答球迷關於「C朗定美斯?」嘅提問,佢嘅答案非常圓滑,但其實幾有道理,佢話:「我一定會話美斯係完全嘅足球天才!不過,對於任何年輕球員嚟講,只要佢哋學C朗咁努力,就有機會出人頭地。」其實咁講唔係廢話,泰利嘅意思係,佢認為美斯喺足球天賦上係第一,無人能及,但C朗示範咗點樣憑驚人嘅努力成為同等嘅球王級人馬,簡單嚟講就係一般人幾努力都冇可能學到美斯,但超努力係有可能學到C朗 (當然,C朗其實係努力嘅天才,有人認為佢嘅身體質素係先天優勢加後天努力得嚟,一般人學C朗咁操隨時出事)。


佢嘅前車路士隊友艾殊利高爾喺《Sky Sports》節目《Monday Night Football》上,同樣被問到類似問題,問題係到底C朗定美斯更難防守。艾殊利高爾毫不猶豫就答:「一定係美斯。大家以為我會話C朗,因為我對C朗嘅次數比較多。不過我覺得如果要美斯狀態好嘅時候防守佢,直頭係冇得守。
不過,佢從來未對過我入波 (笑) 。」
https://www.youtube.com/watch?v=vhub3fEkEuI

你又buy邊個嘅答案多啲呢?

Source: Sportbible、Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→