重傷休養逾200日,被遺忘之人終重返車路士大軍註冊名單

睇足365 於 07/02/2019 發表 收藏文章
2013年加盟車路士,呢位中場球員現時已經係車路士陣中加盟時間最耐嘅四位球員之一,只有加利卡希爾、艾斯派古達及夏薩特排喺佢前面,但佢至今只為車路士於聯賽上陣2次,多次被外借,有好表現時又被傷患所累,佢係荷蘭中場雲真高 (Marco van Ginkel)。


曾經作為明日之星被帶到車路士等待成材,被期望有朝一日成為車路士傳奇林柏特之後最好嘅中場,雲真高嘅天賦有目共睹,榮獲2012-13告魯夫獎 (荷甲年度最佳年青球員) ,史尼達、洛賓、艾歷臣都曾經拎過呢個獎,結果雲真高吸引到當時車路士領隊摩連奴花費800萬英鎊將佢由荷甲維迪斯帶嚟史丹福橋。奈何,雲真高加盟後第一個球季,就喺9月遇上十字韌帶重傷,休戰177日。之後,佢先後被外借到AC米蘭及史篤城,表現一般。


雲真高技術出色,有能力為球隊控制節奏、送出致命一傳、處理死球,甚至車路士現時最需要嘅後上攻門,但佢最大嘅弱點正係對抗性不足,喺英超環境中可謂致命死穴。2016-17下半季,雲真高被外借到荷甲PSV,重返祖國聯賽令佢如魚得水,15場聯賽就射入7球兼交出4個助攻,效率驚人,更令車路士同佢續約到2020年。2017-18球季,PSV續借雲真高一年,佢又喺28場聯賽中貢獻14入球、4助攻,證明上季表現並非曇花一現,效力PSV一季半期間亦幾度獲得荷蘭國家隊徵召。


不過,雲真高今季卻淪為球場上嘅失蹤人口,如果唔係車路士球迷,有機會已經忘記咗佢而家仲喺藍軍,因為佢再一次遇上嚴重膝傷,需要進行手術開刀處理,已經由2018年6月休養至今,合共250日。似乎車路士同雲真高八字相沖,因為佢生涯中幾次嚴重傷患都係喺車路士中發生,根據《Transfermarkt》資料顯示,佢此前合共以車路士球員身分 (不計外借期間) 養傷262日,喺其他球會就只有17日,而佢今次本來已經被傳即將永久轉會加盟PSV,只係因為喺2018年6月1日不幸重傷而作罷,喺6月30日正式結束外借歸隊,所以扣除中間嘅30日,佢喺車路士養傷嘅日子已經增加到482日。


車路士球迷喺法比加斯離隊之後,一定想質問主帥沙利究竟用邊個取代法比加斯嘅中場位置。實際上,喺英超註冊名單中,直接取代法比加斯嘅,正係此前未被註冊嘅雲真高。如果佢可以踢出PSV時期嘅水準,當然可以為車路士帶嚟新衝擊,但問題係原來佢仍未完全康復,大約需要一個月時間先可以參加一隊操練,只好求神拜佛希望佢順利康復,而且唔再遇到重傷。

loading
loading


雲真高荷甲片段:
https://www.youtube.com/watch?v=TgDx5UWyc60

Source: Sportbible

留言


請按此登錄後留言。未成為會員? 立即註冊
    快捷鍵:←
    快捷鍵:→