前輩都冇面俾！連加特出惡搞post，恥笑楊格食雀屎事件

最近球場附近啲小動物特別熱愛足球，分別有黑貓闖有球場近距離「觀看」愛華頓對狼隊嘅賽事，同埋有雀仔喺李斯特城對曼聯嘅比賽中落場食草，前者黑貓引嚟嘅回響就大得多，因為佢的確係十分型仔，而且喺網上引起球迷講起外號同樣係「黑貓」嘅新特蘭，唔知何年何同先可以重返英超賽場。不過，隻雀仔喺連加特出post之後，相信會受到更多注目。


相信大家一定記得發生喺艾殊利楊格身上嘅經典一幕：話說喺2014年8月16日，2014-15英超第一輪比賽，曼聯對史雲斯中，曼聯球員艾殊利楊格被拍到喺開口講嘢途中，有白色物體由高處飛入佢口中。短片當時喺網上瘋傳，球迷認為楊格不幸食到雀屎，更討論雀屎剛好飛球場上空時排便，剛好擊中楊格，而楊格又剛好開口嘅機會率。

https://i.imgur.com/Sq1kqa0.gif
其實一年之後，英國傳媒衛報《Guardian》已經喺訪問時當面提及「雀屎事件」，楊格表示自己100%肯定自己冇食到雀屎，又話好想知道一開始發布呢條片嘅人係點做到，亦都好奇如果自己真係食到雀屎會有乜反應。不過點都好，大家都會繼續惡搞楊格。事實上，楊格喺當年訪問中都透露，曼聯隊友正係用呢樣嘢嚟同佢開玩笑，佢哋夾手夾腳排咗一隻假嘅雀仔喺佢locker上面。 (《Ashley Young: Pigeon did not poo in my mouth》)

時至今日，大家仲未忘記呢件事，曼聯中場連加特，雖然係艾殊利楊格嘅後輩，但一樣唔俾面，出post惡搞楊格。連加特喺對李斯特城呢場波之後出個twitter post，分享比賽當日有雀仔出現喺場地內嘅相片，並且話：「嗰種動物今日喺球場出現，好彩冇走埋去。」仲用上大便emoji，十分搞鬼。有球迷喺下面回應，表示當時十分緊張，馬上為楊格祈禱，希望佢個口唔好打開。