阿積士中場法蘭基迪莊 (Frenkie de Jong) 成為各大歐洲豪門轉會目標，離開相信只係時間問題，今個一月轉會窗，各大球會採取行動，勢將喺一月之內促成轉會。根據近日消息，法蘭基迪莊嘅新球會熱門係巴塞隆拿或巴黎聖日耳門，但傳聞指巴塞隆拿已經喺呢場爭奪戰中擊敗PSG，成功將佢收歸旗下，巴塞名宿兼體育總監艾比度嘅回應就不置可否。
21歲荷蘭國腳法蘭基迪莊今季於荷甲賽事上陣16場，貢獻4入球1助攻，盤傳俱佳，被視為新一代中場球員之中，較擅長掌控攻守轉換嘅球員，佢除咗主要擔任中場中之外，亦可踢防守中場及中堅位置。
根據加泰隆尼亞電台消息，球員經理人曾經同巴黎聖日耳門、曼城及祖雲達斯接觸，並告知佢哋球員已經決定接受巴塞隆拿嘅條件。巴塞方面亦會喺日內派人前往荷蘭完成手續，消息指轉會費約為7,500萬歐元，可分三期支付，消息獲《ESPN》轉載。另外，《每日體育報》引述荷蘭報章《De Telegraaf》，指相信轉會費已經提高至約9,000萬歐元。
根據《Sky Sports》日前刊出訪問，巴塞名宿兼體育總監艾比度 (Eric Abidal) 指巴塞正等候球員答覆：「呢個問題 (交易成事機會) 應該問返球員本人，佢知道有好多球會對佢有興趣，佢自己會作出決定。我哋同其他人一樣，只可以等待。」
球王片 (ScoutNationHD)：
https://youtu.be/ISFIWwRrRe4
Source: Sport.es、ESPN、Marca、SkySports
請按此登錄後留言。未成為會員? 立即註冊