名宿狠批等退休、艾馬利勸離隊 奧斯爾中激將法狂加操,「賴死唔走」自己前途自己救

睇足365 於 18/01/2019 發表 收藏文章
阿仙奴中場奧斯爾向來令人又愛又恨,佢嘅創造力、視野、球感無疑係球壇頂級,但另一方面,佢狀態飄忽、球風偏軟、缺乏鬥志,多次被批評喺面對強敵時「隱形」。我哋冇辦法得知佢真實嘅心理狀態,不過從球場上表現睇,好多人都認為佢hea踢、揀波踢,只適合做奢侈品。球員都係人,人就有唔同性格,有一啲人唔係懶,但佢需要久唔久得到一啲外來刺激,先可以激發佢進步,筆者相信奧斯爾正係呢種人。


其實部分對奧斯爾嘅批評唔太公平,奧斯爾由當初喺雲達不萊梅嘅全能進攻中場,去到皇家馬德里專心餵波,再到阿仙奴被期望一個人揹起球隊,佢需要適應嘅轉變好多,例如佢明顯比起初登陸英超時,肌肉量增多、對抗性有明顯改善,如果睇足90分鐘比賽嘅話,都會發現佢不時有幫手壓迫同回防,甚至因為落腳攔截而犯規,而佢嘅跑動距離通常都唔會少過大部分隊友。不過,佢狀態長期起伏不定,同風格上難以配合艾馬利期望嘅高強度足球,亦係事實。

最近,奧斯爾受傷休戰,但健康時亦上陣時間大減,不免令人合理地猜測,佢可能已經唔喺艾馬利計畫之中,而佢拎住隊中破紀錄嘅35萬鎊周薪,被急急清走亦唔係奇事。阿仙奴名宿比堤早前接受訪問時就評論,認為奧斯爾已經失去踢波嘅動力,就好似等退休一樣,但相信佢唔會喺一月離隊。阿仙奴新聞網站 《Arseblog》 引述《BBC》阿仙奴消息權威 David Ornstein 喺《BBC 5 Live》上指,艾馬利曾經勸奧斯爾離隊遭拒:

「呢個唔係傳言,艾馬利已經向奧斯爾建議,話佢離隊對雙方都係好事,而球隊高層都認為奧斯爾離開係好事。

我認為呢個主要係財政考慮,一個球員拎住35萬鎊周薪,同時唔能夠穩定咁交出呢個水平嘅表現。不過奧斯爾冇離開嘅打算,佢唔會喺一月走。我得到消息指佢而家好努力訓練去提升狀態,嚟自阿仙奴訓練基地嘅消息話佢而家好積極喺gym房加操,態度十分正面,下定決心要重奪主力位置。消息話佢一向都唔會好似其他球員咁做額外嘅訓練,但而家佢開始咁樣做,最近內部有好多關於佢嘅正面消息,佢嘅行為、態度、投入程度、隊友關係等等都係正面。」

loading
loading


所有留意阿仙奴新聞嘅球迷都知道《BBC》記者 David Ornstein 報導嘅所有嘢已經係半官方、99%真確,艾馬利當然唔會公開講自己曾經叫奧斯爾走人,佢最近就話冇諗過奧斯爾離隊嘅問題,但就承認同奧斯爾傾過穩定性問題:「我同佢傾過,因為我想要穩定性。佢有時會有各種傷病,有時狀態OK,有時唔OK。我要每一個球員每一日都一樣咁工作,每一場比賽都要OK。對奧斯爾嚟講,我對佢嘅要求同其他球員一樣。如果佢OK,今個星期會上陣對車路士,而家佢已經持續努力訓練兩星期,我覺得佢可以嘅。」


所謂「賴死唔走」有兩面,負面嘅係明明冇料又要留低呃飯食,正面嘅係留低接受挑戰逼自己進步,咁筆者相信奧斯爾係正面嘅「賴死唔走」。根據《Sky Sports》近日對艾馬利進行嘅專訪,艾馬利表示自己有時會刻意挑起磨擦,去激發球員嘅潛能:

「有啲時候,我會專登同球員製造磨擦。

作為領隊,當然要小心呢啲磨擦可能導致關係破裂。不過我永遠都會要求更多,無論對個人定群體而言,我會透過舒服嘅對話方式,或者冇咁舒服嘅對話方式去做。

我哋都知道需要向球員施加壓力,當一個球員付出70%,就要佢付出80%,如果佢付出80%,就要佢付出90%,人永遠都有更進一步嘅可能,心理學可以證明呢一點。」

夾埋所有嘢嚟睇,有理由相信奧斯爾正係艾馬利激進法嘅對象,而睇嚟佢相當成功,一個搏命嘅奧斯爾,仲唔值35萬鎊周薪?

Source: BBCArseblogSkySports

留言


請按此登錄後留言。未成為會員? 立即註冊
    快捷鍵:←
    快捷鍵:→