曼城簽下隊史首位日本球員，隨即外借到格羅寧根夥拍堂安律

日本年輕球員一直吸引歐洲球隊注目，堂安律 (DŌAN Ritsu) 及中島翔哉 (NAKAJIMA Shōya) 等已經喺2018年聲名大噪，亦有不少相對名氣唔大嘅球員成功到歐洲聯賽學法，今日就有20歲柏雷素爾中場安西海斗 (ANZAI Kaito) 加盟葡超球隊布拉加。不過呢位年輕中場外闖嘅消息喺今日公布實屬「不幸」，因為呢單消息必定被以下另一單消息搶去大部分焦點：英超曼城簽下板倉滉 (ITAKURA ko) ，成為球隊史上首位日本球員。


坊間一直傳得正盛嘅消息，本來係曼城對於格羅寧根中場堂安律十分興趣，呢位20歲中場憑出色表現入選新設嘅「U21金球獎」高柏獎 (Kopa Trophy) 最後10強，同現今世上最備受注目嘅球壇新星比肩。不過，曼城今日突然從J League球隊川崎前鋒簽下21歲嘅板倉滉，實在令人意外。



板倉滉於川崎前鋒青訓體系升上一隊出道，2018球季被外借到仙台維加泰鍛練，為球隊於各項賽事32場攻入3球，身高1.86米嘅佢主要擔任中堅，亦可出任防守中場，將會喺今個月底年滿22歲。


板倉滉成為曼城史上首位日本球員，不過礙於工作證問題，加上需要適應歐洲聯賽，曼城隨即將佢外借到荷甲球隊格羅寧根，與另一位傳聞係曼城目標嘅日本新星堂安律成為球會隊友。

(柏雷素爾中場安西海斗亦於今日加盟葡超布拉加)
板倉滉球王片：
https://www.youtube.com/watch?v=wjmgFJ6jNfY
Source: fcgroningen、yahoo.co.jp、gekisaka.jp、ultra-soccer.jp