死心吧!艾馬利親口表示:阿仙奴一月冇錢買人,只考慮租借

睇足365 於 11/01/2019 發表 收藏文章
跟據近日轉會傳聞,阿仙奴正積極尋求一位中場球員,傳得火熱嘅有兩位艾馬利舊部——班尼加、丹尼斯蘇亞雷斯。不過,阿仙奴一向並非揮霍無度型球隊,雖然雲加已經離任,但槍手仍然維持一貫量入為出嘅理財哲學,若然球迷憧憬今個一月轉會窗可以見到咩驚天動地嘅重大收購,恐怕要失望而回。


最近,著名足球記者 Gianluca Di Marzio 報導,指阿仙奴即將向巴塞隆拿求購苦無上陣機會嘅丹尼斯蘇亞雷斯,呢位24歲中場係曼城青訓學徒,轉投巴塞之後,曾經以外借形式喺西維爾同時任主帥艾馬利合作一季,當時係丹尼斯蘇亞雷斯生涯首次成為頂級聯賽職業球隊主力。「丹蘇」之後轉到維拉利爾,憑出色表現吸引巴塞回購,但佢今季只為巴塞於聯賽出場17分鐘,因此有傳佢希望與可以幫助自己重回正軌嘅艾馬利重聚。


艾馬利對於收購「丹蘇」嘅傳聞不置可否,但佢早前只係曾經表明球隊希望引入一名中堅及翼鋒。最近,艾馬利接受訪問時表示自己唔清楚「丹蘇」嘅處境,更直言球隊只可能以租借方式引援:

「我哋冇辦法以永久轉會方式簽下任何人,今個一月只可以借用球員。

我唔清楚佢 (丹尼斯蘇亞雷斯) 嘅情況。

不過我知道球會正在努力尋找合適嘅球員去幫助我哋。」


艾馬利又被問題係唔係對另一位舊將班尼加感興趣,佢大讚對方係好球員:

「佢係一個好好嘅球員。我唔可以講太多。球會做緊嘢,不斷話我知任何事情都可能發生。喺呢個moment,我冇任何消息可以講。」

《BBC》阿仙奴專家 David Ornstein 早於超過一星期前,已經率先爆料,指阿仙奴於一月轉會窗可動用資金有限,較大機會以外借方式引入巴塞中場丹尼斯蘇亞雷斯等潛在目標。丹尼斯蘇亞雷斯喺啱啱一場西班牙國王盃16強首回合中,為巴塞後備上陣搏得12碼,令古天奴為球隊追回一球,輸1-2留有一線生機。有傳丹尼斯蘇亞雷斯同意加盟阿仙奴,但巴塞並唔願意以外借形式將佢放出。


Source: Sky SportsTelegraph

留言


請按此登錄後留言。未成為會員? 立即註冊
    快捷鍵:←
    快捷鍵:→