般尼棄用祖赫特即取三連勝,昔日英格蘭門神恐流落英冠

睇足365 於 11/01/2019 發表 收藏文章
英格蘭門將祖赫特曾經貴為首席國門,喺曼城被哥迪奧拿棄用時,唔少球迷都替佢不值,估唔到當時只係佢噩夢嘅開端。正所謂「人衰行路打倒褪」,講嘅係當一個人運滯起上嚟,好似黑氣纏身,緒事不順。相信好多球迷不論睇精華或者睇全場都好,都會認同般尼今季防守差勁,祖赫特並冇特別犯錯,但球隊一將佢棄用,馬上就取得三連勝,加上球隊本來已經有兩位有力競爭英格蘭國家隊正選嘅門將在陣,祖赫特勢必難以翻身。


般尼喺門將位置上,本來已經擁有湯希頓 (Tom Heaton) 及尼克普比 (Nick Pope) 兩位具級數門將,隊長湯希頓上季因傷長休後,尼克普比橫空出世,一舉入選2018世界盃英格蘭大軍名單,但佢喺7月底重傷,令般尼陷入門將荒,結果於季前簽入前曼城門將祖赫特救亡。


祖赫特今季為般尼出戰19場聯賽,共失41球,只有4場取得 Clean Sheet ,場均失球達到2.16球,而球隊喺英超失42球,亦屬於全英超第二多,僅少過失47球嘅富咸。當然,門將失球數字唔一定可以反映佢個人表現,球隊整體表現對門將亦有極大影響,而祖赫特事實上並冇犯下大錯,頂多只可以話佢無力回天。

不過點都好,現實就係,祖赫特喺2018年12月26日主場被愛華頓大炒1-5之後,被貶為後備,領隊戴治重新換上傷癒復出嘅隊長湯希頓把守大門,結果連續兩場聯賽取勝 (2-0主勝韋斯咸、2-1客勝哈特斯菲) ,合共只失1球,而喺最近一場足總盃,就用上同樣傷癒復出嘅普比,以1-0輕取班士利,各項賽事錄得3連勝。要知道,般尼此前喺今季各項賽事法定時間內只贏過三場,今次三連勝實屬罕見。


湯希頓及普比復出之後,般尼相信已經唔需要31歲嘅祖赫特,另外般尼陣中其實仲有前曼聯門將連迪加特,即使並非屬於頂級,亦係稱職嘅第三門將。《馬卡報》及《太陽報》報導,英冠下游球隊普雷斯頓有意於今個轉會窗內提出租借祖赫特。當然大家知道《太陽報》轉會消息向來不可信,而《Sky Sports》亦報導指戴治表示未接到任何關於祖赫特嘅報價,但以祖赫特近來喺般尼嘅遭遇,同埋湯希頓及普比同時復出嚟睇,至少可以肯定佢喺般尼已經冇翻身機會,都係及早離場吧啦。

Source: MarcaSky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→