有人曾經半開玩笑咁講過，英冠係世上最激烈聯賽，的確只有一半係講笑，因為24支球隊為咗升上英超嘅天價電視轉播合約以及商業收益，拼個你死我活，仲未計即使做一季「升降機」上一上英超再馬上降班，都可以得到數以千萬英鎊計嘅「保護傘補助」 (parachute payment) 。極度密集嘅賽程，令呢個次級聯賽更添不穩定因素，英冠球隊全季需要應付46輪聯賽，一段低潮期或者傷病潮，足以「致命」。英冠嘅技術水平的確不及頂級聯賽，但每一場比賽嘅激烈程度、不確定因素，以至整體聯賽形勢，都令呢個聯賽十分緊湊。啱啱英國傳統 Boxing Day 比賽日，英冠就出現一場十分戲劇性嘅比賽，更對聯賽形勢有重大影響。
英冠第24輪，諾域治主場對諾定咸森林，喺上半場補時階段，森林中場馬迪卡殊 (Matty Cash) 喺禁區搶走諾域治右閘新星麥斯艾朗斯 (Maximillian Aarons) 腳下球 (剛好最近傳出熱刺對呢位小將有興趣)，為客軍先開紀錄。主隊諾域治雖然一直有攻勢但未能把握，亦略略欠運，更於65分鐘被積克羅賓遜把握死球攻勢門前混戰射入，落後到0-2。74分鐘，馬迪卡殊接應隊友落底 cut back 傳送射入個人今仗第二球，此時諾域治落後至0-3，大部分球迷可能認為主隊已打定輸數。
不過，3分鐘後主隊運氣逆轉加上努力獲得回報，馬里奧維蘭斯 (Mario Vrančić) 於77分鐘遠射省中人改變方向人網，追近至1-3。好戲喺補時階段先正式上演，後備上陣嘅奧尼爾靴南迪斯 (Onel Hernández) 94分鐘右路突破窄角度射成2-3，再於接近98分鐘入楔射入扳平一球，成功救主。
另一邊廂，列斯聯亦喺補時階段連入兩球，以3-2反勝布力般流浪。諾域治正係憑呢一分，得以繼續對列斯聯施加壓力。24輪聯賽過後，諾域治以48分排第2位，僅以3分之差落後榜首列斯聯，同時以3分領先第3位嘅西布朗。
賽後，諾域治主帥法克 (Daniel Farke) 為球員感到驕傲，又感謝球迷一直落力為球隊打氣；森林主帥卡蘭卡 (Aitor Karanka) 就坦言呢場比賽十分瘋狂，認為球隊犯下錯誤而獲得教訓，又稱對手今季十分強大。
全場精華
https://streamable.com/yp4ij
Source: Sky Sports、 Daily Mail
請按此登錄後留言。未成為會員? 立即註冊