阿仙奴傷猛將影響大，米希達恩蹠骨骨折料休戰至二月

阿仙奴一向同傷病離唔開關係，今季更換醫療及教練團隊後，情況似乎已經稍有好轉，不過佢哋最近曾經試過遇上「左閘荒」、「中堅荒」及「右閘荒」，所幸賽程唔想難踢，一眾「替工」如小將尼奧斯甚至邊緣人贊堅遜等亦能完成任務。


不過，球隊繼韋碧克及賀定重傷之後，再有米希達恩加入中長期傷兵名單。米希達恩於上星期三英格蘭聯賽盃八強對熱刺一仗，上半場被對手翼鋒盧卡斯摩拉剷傷，半場即被換出。


上周六聯賽對般尼一仗，米希達恩連大名單都未有入選。隨後，阿仙奴證實呢位亞美尼亞中場因為蹠骨骨折，需要養傷約六星期。


米希達恩相信將會缺席對利物浦 (12月29日) 、車路士 (1月19日) 及曼城 (2月3日) 幾場大戰，至二月中先可以復出。米希達恩今季於阿仙奴表現飄忽，亦非必然正選，不過對兵工廠陣容深度及主帥艾馬利戰術安排，仍有一定重要性，米希達恩養傷期間，艾馬利可以依賴嘅接近類型球員，只剩低奧斯爾及伊禾比，但佢哋所能提供嘅元素亦不盡相同，更減少咗佢哋嘅輪休空間。

另一方面，有傳艾馬利對於奧斯爾表現唔太滿意，雖然奧斯爾喺上場聯賽正選上陣表現出色，但亦唔能夠忽視艾馬利對球員嘅速率及態度嘅要求，始終同奧斯爾特質有所出入，因此有傳阿仙奴將會喺一月轉會窗交易奧斯爾，但如今米希達恩受傷、加上藍斯前途成疑，可能會對計畫造成巨大影響，除非阿仙奴真係可以喺一月換嚟伊斯高呢個級數嘅中場球員。

除咗米希達恩、韋碧克及賀定需要養傷一段時間外，比爾連、梅斯達菲、哥拿仙歷亦於今輪賽事上陣成疑，年輕中堅馬法路彭路斯預計一月復出。

Source: BBC、Transfermarkt、PhysioRoom