老貓燒鬚！老牌門將哥頓犯下「卡列奧斯式」錯誤，幸另一邊廂兩軍「攬炒」無阻出線 精選

利物浦門將卡列奧斯喺上季歐聯決賽中犯下大錯，特別係直接送俾賓施馬射入一球，相信球迷至今仍然歷歷在目。喺歐霸分組賽最後一輪，蘇格蘭超級聯賽老牌球會些路迪幾乎因為門將哥頓 (Craig Gordon) 類似錯誤，好彩並冇影響球隊因同組另一場賽果而最終驚險出線。


歐霸盃B組賽事，前利物浦主帥羅渣士率領嘅些路迪，主場迎戰榜首已篤定出線嘅薩爾斯堡。賽前，些路迪以9分排小組第2位，而第3位嘅RB萊比錫亦手握6分進逼，如果些路迪今仗輸波，而RB萊比錫成功擊敗洛辛堡，些路迪同RB萊比錫將會同分，需要計對賽成績。


戰意不一定反映實際戰況，呢句說話同樣適用於B組兩場比賽。肯定可以首名出線嘅薩爾斯堡今場只係例行工事，但唔代表些路迪可以輕易取勝；洛辛堡無論如何都會包尾出局，但亦唔代表會俾全力爭取出線嘅RB萊比錫比下去。


些路迪對薩爾斯堡一仗，67分鐘薩爾斯堡打破僵局領先；77分鐘，薩爾斯堡後場大腳長傳，些路迪門將哥頓於禁區接實，隨即以手拋球方式傳俾左邊隊友，但薩爾斯堡前鋒古白蘭臣 (Fredrik Gulbrandsen) 已經加速到達門將左方，伸腳一篤，追前輕鬆射入空門，令些路迪輸到0-2。
https://i.imgur.com/hynB4yC.gif

另一邊廂，RB萊比錫亦正領先洛辛堡1-0。如果兩場比賽以當時比數完場，RB萊比錫將會追上與些路迪同分，並根據歐霸賽制，以對賽得失球差優勢 (萊比錫主場2-0擊敗些路迪；些路迪主場2-1擊敗萊比錫) 反壓些路迪晉級。不過，今屆賽事仍未取得一分嘅洛辛堡不甘示弱，竟然於86分鐘追平1-1，並維持比數至完場，洛辛堡取得今屆唯一一分，而更同萊比錫「攬炒」齊齊出局，益咗喺95分鐘破蛋輸1-2完場嘅些路迪。最終B組由薩爾斯堡及些路迪晉身32強。
https://www.youtube.com/watch?v=lNYG72pz2H0
賽後，蘇格蘭國門哥頓接受訪問，認為自己喺比賽中其餘時間表現唔錯，但呢個犯錯的確令自己失望，佢解釋為冇估計到對方前鋒逼得咁快咁近，而且做得好好咁預料到佢動作。結果佢為失咗呢球波本來應該打自己一身，但好彩球隊最終成功晉級。


現年35歲嘅哥頓2007-2012年曾經效力當時征戰英超嘅新特蘭，遇上惡運連環重傷，一度離開職業足球兩年，以半職業身分兼任教練，終於喺2014年得到些路迪開出合約，重返職業賽場更重新奠定國家隊門將席位。難怪今次失誤後，深得球迷愛戴嘅佢仍然得到球迷寬容對待。


(曾效力些路迪嘅聖莊士東前鋒東尼獲特亦力捧哥頓)
兩球一齊睇：
https://i.imgur.com/hynB4yC.gif
https://i.imgur.com/KwbzZNB.gif
哥頓曾被譽為有望成為英超最強門將之人，更曾作出世紀撲救：
https://i.imgur.com/kY29731.gif

Source: Sportbible