「奧地利高普」將執教修咸頓,哈辛赫圖係咩人?

睇足365 於 05/12/2018 發表 收藏文章
英格蘭老牌球會修咸頓近日因為成績欠佳,即使主場賽和曼聯,仍然喺賽後不久宣布解僱領隊曉士。事實上,修咸頓踢罷14場英超比賽,只贏過一場,其餘錄得6和7負,即使意外賽和曼聯,仍然只得9分排第18位,曉士有幾多力挽狂瀾嘅本事,多年英超球迷早已心裡有數,所以「聖人」求變實在刻不容緩。


雖然暫時未有官方宣布,但根據《Sky Sports》、《Guardian》、《Telegraph》等多間英國大型傳媒報導,修咸頓已經落實由奧地利籍教頭哈辛赫圖 (Ralph Hasenhuttl) 執教,雙方將會簽約至2021年季尾,消息指周中對熱刺一仗 (香港時間今晚深夜) ,「聖人」會按計畫由暫代領隊、前門將奇雲戴維斯 (Kelvin Davis) 督師,哈辛赫圖會先喺看台上「閱兵」,並於當日正式簽約 (英國時間周三)。


哈辛赫圖絕非球壇新面孔,但善忘嘅球迷可能一時忘記咗呢位前RB萊比鍚教頭。現年51歲嘅哈辛赫圖球員生涯並不出眾,司職前鋒嘅佢效力過奧地利維也納、薩爾斯堡 (薩爾斯堡紅牛前身) 、科隆及拜仁慕尼黑二隊,代表奧地利國家隊8次射入3球。佢喺2007-10於德丙球隊安德赫治 (SpVgg Unterhaching) 展開執教生涯,2011年過檔到同處德丙嘅艾阿倫 (VfR Aalen) ,開始扶搖直上。


於季中接手球隊時,艾阿倫仍然處於降班區邊緣,但哈辛赫圖以半季時間為球隊完成護級任務,第二季隨即帶領球隊升班,更馬上以前10位成績完成首個德乙球季,但佢喺季尾因為同高層意見分歧而離隊,正式展開佢嘅神奇之旅。

2013年10月,哈辛赫圖成為德乙球隊恩高斯達特 (FC Ingolstadt 04) 主帥,首季協助球隊由榜尾升上第10位。第二季 (2014-15),恩高斯達特喺哈辛赫圖帶領之下,全季34場聯賽只錄得4場敗績,以榜首姿態歷史性升上德甲。2015-16球季,升班馬恩高斯達特自然係降班大熱,但哈辛赫圖幫助球隊以第11名完成球季。季後,哈辛赫圖轉任新升班馬RB萊比鍚主帥,結果恩高斯達特馬上於2016-17球季降班收場。


喺RB萊比鍚經濟環境許可之下,前鋒出身嘅哈辛赫圖得以大打進攻足球,拿比基達及添姆雲拿喺佢麾下發揮出色,成為歐洲大球會嘅獵物,兩年間球隊分別以德甲亞軍及第6名完成,不過最終因為與體育總監意見不合而離職。


特別喺萊比鍚期間,激情、熱愛高位壓逼、高強度、直接快速嘅進攻風格,令哈辛赫圖被譽為「奧地利高普」。其實佢自己都被問過同高普之間嘅相似之處:「我同高普的確一齊上過教練班,我哋都好熟。我諗我哋有相近嘅足球哲學,一樣希望踢出快節奏嘅比賽,要求己方球員四處跑動、上前逼搶,呢啲元素令球賽更加生動悅目,令人振奮。有時我都會跑出嚟慶祝,不過只有喺好特別嘅情況下咁做,高普有時都會咁做!」


高普亦回應哈辛赫圖執掌修咸頓嘅消息:「佢係一個好好嘅人,佢嘅足球生動、進取,又鍾意逼搶。 [執教修咸頓] 應該係一個雙贏局面。」

《Sky Germany》記者Max Bielefeld報導時大讚哈辛赫圖,指佢對培養新血有一手,喺德國足壇深受尊重,同高普一樣十分熱情,亦喜愛喺記者會開玩笑,相信英國人都好快會愛上佢,另外又預測佢鴞修咸頓嘅前景:「哈辛赫圖喺RB萊比鍚時期慣常排出4-2-2-2陣式及打壓逼足球,哈辛赫圖習慣使用靈活而強壯嘅球員,呢樣嘢對佢嘅風格好重要。我認為現時修咸頓陣容應該幾適合佢,佢真心希望球迷帶嚟正面嘅感受,我好肯定修咸頓球迷一定鍾意佢嘅風格。」

Source: Sky SportsGuardianTelegraph

留言


請按此登錄後留言。未成為會員? 立即註冊
    快捷鍵:←
    快捷鍵:→