傳執雲加二攤 雲尼亞里接替「徒弟」,成富咸火速教兵

睇足365 於 15/11/2018 發表 收藏文章
英超升班馬富咸今個夏天豪花1.09億英鎊擴軍,相信有意收購埋溫布萊球場嘅富咸班主 Shahid Khan 一定對球隊現時成績極度不滿。12輪聯賽過後,富咸只錄得1勝2和9負嘅劣績,排聯賽榜尾,而轉會花費更少嘅狼隊就進佔中游第11位,只用2,768萬鎊增兵嘅卡迪夫城亦領先富咸3分。為護級形勢著想,富咸日前宣布解僱領隊祖簡奴域,由前李斯特城主帥雲尼亞里接任。


富咸於聲明中表示班主近日接觸過多名候選人,最終決定以雲尼亞里為新帥人選。根據《Telegraph》報導,認為富咸曾經接觸嘅領隊人選包括前阿仙奴主帥雲加,不過雲加已經婉拒邀請,事實上雲加早前接受《BBC》訪問時已經表明唔會再執教任何英超球會:「我已經將一生奉獻俾一間球會,再執教另一間英格蘭球會將會係好困難而且不能接受嘅事。」


結果,富咸選擇咗另一位「雲爺爺」,個人認為絕對係明智之舉。雲尼亞里執教生涯錦標唔算多,喺2015-16球季帶領李斯特城奇蹟封王係佢首個頂級聯賽獎盃,亦係驚喜之作。此外,雲尼亞里大部分時間以「救火」聞名,特別擅長幫助球隊由亂局中平穩過嚟,或者作為大球會領軍一兩年過渡期嘅人選。


今季富咸表現之差,極大程度歸咎於球隊防守及默契問題。富咸12場聯賽共攻入11球,其實唔算太差,因為聯賽榜11、12位嘅狼隊及白禮頓其實都只係分別攻入12及13球,但呢兩支球隊分別只失13及18球,係遠離降班區嘅關鍵,而富咸就足足失咗31球。默契方面,富咸今季一次過引入12名球員,當中只有前鋒米祖域上季已租借加盟,其他11名新兵同球隊已有陣容嘅磨合,大大影響球隊戰績。改善防守同陣容磨合似乎剛好係雲尼亞里嘅強項,相信佢可以憑豐富經驗助球隊護級。


今次雲尼亞里接替祖簡奴域,特別之處係祖簡奴域曾經效力於雲尼亞里麾下。雲尼亞里於2000年執教車路士,首筆引援正係南斯拉夫國腳祖簡奴域,當時雲尼亞里以170萬鎊簽下呢位32歲防守中場。可惜祖簡奴域未能適應英超及融入球隊,只為球隊上陣過39場聯賽而且以後備上陣居多,亦未能贏得球迷歡心。2002年離隊轉投西乙球隊 Ciudad Murcia 之後只踢咗三個月就宣布退役。

Source: Telegraph Evening Standard

留言


請按此登錄後留言。未成為會員? 立即註冊
    快捷鍵:←
    快捷鍵:→