哈特斯菲終開齋兼破半年主場入球荒 五大聯賽僅剩一隊不勝部隊

睇足365 於 06/11/2018 發表 收藏文章
英超開季已賽11場,三支升班馬中只有第11位嘅狼隊一枝獨秀,同樣大肆擴軍嘅富咸就同卡迪夫城一樣岌岌可危,只得1勝。除咗呢兩隊升班馬之外,上季護級成功嘅哈特斯菲今季其實亦非常令人擔心,因為佢哋今季頭10輪比賽未嘗一勝,兼且陷入主場入球荒,上一次取得主場聯賽入球,已經係4月14日對屈福特一仗。喺呢個背景之下,噚晚深夜, 哈特斯菲對富咸嘅榜尾大戰,可能係催眠良方。

loading

客軍富咸今個夏天豪花1億英鎊擴軍,簽入占舒利、舒爾尼等甚具名氣嘅球員,但開季至今表現甚至稍稍不如低調嘅卡迪夫城,賽前10場聯賽僅取得1勝2和7負,入9球失23球,今仗繼續腳頭無靈、默契欠奉,全場90分鐘只錄得1次射門命中目標。


主隊哈特斯菲雖然攻力疲弱,但喺開賽早段得以主導形勢,15分鐘就有菲臘標寧25碼射門中楣;29分鐘,哈特斯菲角球攻勢被解圍,基斯路維再次傳中送入禁區,基斯杜化舒捷拿同科素文沙同時爭頂,皮球最終落入網中。雖然貌似基斯杜化舒捷拿頭槌頂入,但官方統計顯示為科素文沙嘅烏龍球。呢個入球打破咗哈特斯菲過去659分鐘嘅主場入球荒。


富咸下半場馬上換入基雲麥當奴及施路斯基士堤調整,但仍無補於事,未能構成任何有威脅埋門,只曾有舒爾尼窩利食詐糊。結果,哈特斯菲終於喺第11輪聯賽取得今季第一場聯賽勝仗,以1分之差升上積分榜第18位,而富咸就暫居榜尾。另外,富咸今季11仗已失29球,同2012-13球季嘅修咸頓並列成為英超史上頭11場失波最多球隊。


資料顯示,哈特斯菲係今季英格蘭四級聯賽中最遲取得首勝嘅球隊。縱觀歐洲五大聯賽,目前只剩一支球隊仍未開齋,就係意甲升班馬基爾禾,呢支季前已因為造假帳被扣三分嘅球隊,開季11場,只取得2和9負,聯賽積分為-1。



全場精華
https://streamable.com/qvoq7
Source: Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→