英超第三輪其中一場精彩賽事，係由富咸主場對般尼，呢場比賽雙方合共炮製6個入球，最終由積極增兵嘅升班馬富咸，以4-2大勝般尼，取得今季首場勝仗。
富咸夏季轉會窗大手引入12名球員，其中包括兩名中場悍將——球會「標王」占舒利及前馬賽防中森保安古沙，又有借將舒爾尼、韋圖等，加上上季借入嘅米祖域正式加盟，可謂雄心壯志。不過球壇有一個現象，引授數量，有可能弄巧反拙，因為足球場上，球員間配合默契、陣容穩定性都不容忽視。
英超首兩輪比賽，富咸第一戰面對水晶宮明顯出現配合問題，以致兩球完敗予水晶宮，而次輪對熱刺輸波十分合理。第三場聯賽，富咸終於展現攻擊組合應有火力。
今仗開賽僅4分鐘，占舒利就以一記炮彈式遠射先開紀錄。及後，曾經喺英超發展不順，上季外借到富咸踢英冠卻錄得17場入12球佳績嘅米祖域，終於擺脫「英冠級射手」之名，連續兩次以頭槌建功，展現「空中霸王」本色。
比賽末段，米祖域幾乎完成帽子戲法，引球推入中路遠射中柱，由舒爾尼補射得手，以4-2取得球隊開季首勝。
https://ok.ru/videoembed/988330265190
賽後，富咸主帥祖簡洛域大讚呢位塞爾維亞前鋒：「佢上季已經喺英冠展示過實力，有人認為佢只係英冠級數嘅球員，不過佢而家證明自己有能力喺最高級別嘅比賽打拼。」
Source: Sky Sports
請按此登錄後留言。未成為會員? 立即註冊