面臨崩潰？卡里奧斯友賽英乙隊再派膠失波，從偉大門將失誤看心態與境界 精選

足球場上最殘酷嘅位置，莫過於守門員。一隊波總有兩三名門將，但只有一個可以出場，而且基本上唔會喺比賽中途換人，唔少二、三號門將，一坐就係四五年。縱使際遇使佢成為場上嗰一個，佢平穩發揮一整季都未必有人多謝佢，一個失誤就足以俾人講一世。難怪有門將坦言，呢個係球場上最孤單嘅位置。對於一將功成萬骨枯嘅職業門將位置嚟講，其實技術上肯定大家都唔會差，所以佢哋成為頂級門將嘅障礙，除咗際遇，就係心態居多，而呢樣嘢對於啱啱又有失誤嘅卡里奧斯而言，更為重要。


利物浦門將卡里奧斯今季得到穩定正選機會，發揮一直好出色，直至歐聯決賽嚴重犯錯，直接導致兩個失波，最終球隊以1-3不敵皇家馬德里，令佢當場痛哭。喺呢個大舞台上接連犯錯，卡里奧斯自然淪為笑柄及箭靶。就連事後接受名醫檢查，醫學報告指出有可能因為碰撞導致腦震盪而影響視覺判斷力，都被恥笑，無疑係一大打擊。

近日利物浦開展季前集訓，已有片段流出，稱拍到卡里奧斯於訓練對抗賽中再次「牛油手」，不過只係練波唔緊要。點知喺利物浦同英乙球隊燦美爾嘅友賽中，卡里奧斯竟再次喺眾目睽睽之下接球失誤。當時利物浦以3-0領先，燦美爾得到中路罰球機會，直接勁射，卡里奧斯原本想將個波直接抱實沒收，但判斷錯誤令個波彈返出龍門口正前方，燦美爾球員 Johnny Smith 上前射入空門。利物浦最終以3-2險勝，領隊高普賽後繼續力撐卡里奧斯，表明自己嘅工作係支持球員，又話球隊失嘅第二球都要怪占士米拿，兩位球員都要從錯誤中學習。
https://i.imgur.com/knABCF7.gif

自從歐聯決賽，卡里奧斯似乎冇一日好過，球迷無謂再講「腦震盪幾個月都未好返」之類嘅抽水說話，畢竟安坐家中嘅我哋永遠唔會明白自尊受損對於一個職業門將嘅損害有幾大，正如一啲球員可以因為一場半場好波，就真係自此「升Lv」，相反，當你認為自己唔得，負面效果往往更大。

事實上，即使係公認嘅偉大門將，同樣試過「派膠」導致失波。

「丹麥門神」彼德舒米高：
https://i.imgur.com/SMKqMmc.gif
保方雖然以穩健見稱，但都唔係冇試過出事，喺2012年意甲就試過咁樣：
https://i.imgur.com/qUTBXE4.gif

德國門神簡尼於1997年歐聯分組賽拜仁對哥德堡中接應回傳失誤：
https://i.imgur.com/SAvPzl6.gif
正所謂「神以前都係人」，基本上每一個門將都試過失誤，但呢啲難睇嘅場面唔會妨礙佢哋成為公認嘅頂級門將，原因就係心態同信念，佢哋從錯誤中學習不斷進步，用長期嘅頂級演出說服球迷。

現今幾位頂級門將同樣有難睇嘅失誤，迪基亞都試過，就唔再講，其實紐亞對於「派膠」都毫不陌生：

https://i.imgur.com/vJxYf3m.gifhttps://i.imgur.com/55KGgJ7.gif

不過以上幾位門將嘅長期演出嚟講，佢哋之所以係公認頂級門將，同佢哋嘅心態完全離不開關係，最突出嘅應該係紐亞嘅自信，其他幾位例如係形象較平實嘅保方，其實都係對於自己嘅能力十分有信心，唔會因為一次失誤而消沉同埋懷疑自己，而係越戰越強、不斷追求進步。

所以，卡里奧斯嘅情況係十分令人擔心。無可否認，佢發揮正常嘅時候，係一個好嘅 shot-stopper ，守門技術係有，但集中力或關鍵時刻嘅判斷力、穩定性有好大改善空間。佢最近接二連三犯下嚴重錯誤，反映好大機會係佢信念受到動搖，相信利物浦需要俾佢更大幫助同扶持，甚至喺之後將佢外借去一個適合佢重拾信心嘅地方，否則佢嘅生涯好可能就此「玩完」。