施蒙尼囝囝發威戴帽，拿玻里慘吞費倫三蛋失爭冠優勢

今季歐洲五大聯賽，只剩意甲冠軍席位爭持激烈，拿玻里今季較早前曾一度領先，但後來被祖雲達斯趕上，雙方喺意甲第34輪碰頭，拿玻里絕殺班馬軍團後，聯賽榜只落後前者1分，加上班馬軍團餘下賽程更為凶險，令拿玻里稍佔優勢。


不過，喺最近嘅意甲第35輪，祖雲達斯成功作客以3-2擊敗國際米蘭，拿玻里就作客不敵費倫天拿，令上仗力拼得嚟嘅優勢付諸流水。

https://streamable.com/en731
上仗絕殺入波嘅高列巴尼，今仗比賽未夠10分鐘，就因為侵犯基奧雲尼施蒙尼而領紅牌被逐，令拿玻里早早少踢一人。34分鐘，基奧雲尼施蒙尼單刀輕鬆射入，先開紀錄。
下半場，基奧雲尼施蒙尼於角球攻勢中，門前補射得手，射成2-0。戰至補時階段，佢再次單刀力壓對手守將，射遠柱入網，完成帽子戲法。


大敗一場之後，拿玻里得84分、祖記得88分。餘下3輪聯賽，拿玻里對手係拖連奴、森多利亞及克羅托內，而祖記對手就係博洛尼亞、AC米蘭及羅馬，拿玻里奪冠就要自己盡量贏晒，兼寄望祖記失多幾分先得喇。