摩連奴表示唔明大家嬲咩：「有腦都知我哋喺過渡期入面」

曼聯今季喺英超踢咗30場，取得20勝5和5負，以65分排第二名，成績可以話係一般，但點都唔係差，不過領隊摩連奴就備受壓力。


坊間非正式統計，摩連奴教波通常都跟隨一個軌跡：第一年操起隊波、第二年高峰奪冠、第三年兵變被炒，曼聯戰績比起上季的確有進步，由上季嘅第六位，到今季暫時穩佔第二位，但球迷絕對唔滿意，原因係佢哋落後於同城對手曼城多達16分，加上「摩二季」神話幻滅，場面上更令人昏昏欲睡。最近，曼聯於歐聯16強主場對西維爾輸波出局，又一次被球迷狠批。


領隊摩連奴最近喺《CNN》接受訪問，就再次發揮寸王本色，向批評者作出反擊：

「我明白大家沮喪嘅心情，明白大家對於歐聯出局好失望，不過其他嘢我就唔多明喇。

喺世界足球歷史上，唔止英格蘭，就算最大嘅球會都會經歷過渡期，都會經歷長期嘅成功，呢個係球會嘅不同發展階段。

我諗如果你而家睇下個聯賽榜，有一支球隊一間球會係明顯準備得好過我哋過去幾年，所以佢哋係第一，而我哋有18隊喺後面，一隊喺前面、18隊喺後面。

當然，我哋都想將來有19隊喺我哋後面，不過現實就係咁。

現實就係，只要有腦、有常識、識睇運動嘅人，都知道我哋係喺過渡期之中。
喺過渡期仍然能夠做到上季嘅嘢 (歐霸盃冠軍)，又贏到獎盃，同埋做到我哋今季正在嘗試嘅事，即係繼續爭取獎盃、爭取第二名，因為呢個係我哋今季所能夠去到最高嘅位置，我覺得我哋做得幾好。」

https://streamable.com/0ntjb
Source: CNN、BBC