西班牙點兵　莫拉達落選，馬高斯阿朗素獲首次征召

西班牙國家隊將會於本月與德國及阿根廷進行友賽，作為2018世界盃決賽周試陣機會，主帥盧柏迪古近日公布最新一期國家隊名單。


25歲前鋒莫拉達今季夏天轉會窗由皇家馬德里轉投英超球隊車路士，轉會費高達約6,000萬英鎊，起初交出不俗表現，但其後表現低迷兼入球率急跌，英超上陣24場攻入10球，全部都係喺2017年取得。


另一邊廂，由於馬德里體育會受到轉會禁令影響，苦坐半季先喺今年1月註冊回巢馬體會嘅迪亞高哥斯達，僅用兩個月就贏得眾人肯定，包括贏得馬體會一月最佳球員。事實上，呢位前車路士前鋒，重返馬體會後，西甲上陣9場射入3球及交出3個助攻，各項賽事13場入6球4助攻，場均涉及0.77個入球，而莫拉達場均只造出0.45個入球，難怪由一月開始，已經有部分車路士球迷表示懷念迪亞高哥斯達。

結果，喺新一期西班牙國家隊名單中，「六千萬先生」莫拉達並冇入選，主帥盧柏迪古選擇召入迪亞高哥斯達、艾斯柏斯（切爾達）及洛迪高（華倫西亞）三名前鋒。雖然今次只屬友賽名單，陣容仍有試驗空間，但考慮到與世界盃決賽周只剩三個月，對莫拉達而言，必定係一個警號。

主帥盧柏迪古就解釋：「世界盃唔係聽日就踢，有一啲名單外嘅球員都好大機會可以去俄羅斯。莫拉達過去幾乎一定會入選，佢最近身體出過少少問題，有一段時間冇得到好多比賽機會，我哋決定今次都係揀其他球員比較好。
不過，咁唔代表佢已經唔喺我哋嘅計劃之中，我哋希望佢喺球會中可以有更重要嘅表現，相信佢會以非凡嘅表現完成今個球季，盡力爭取同我哋一齊去世界盃，我對此毫無疑問。」


另外，莫拉達嘅車路士隊友馬高斯阿朗素首次獲征召成為大國腳，呢位27歲左翼衛只曾代表西班牙U19，佢喺上季以出色表現協助車路士問鼎英超冠軍，但一直未入選國家隊，今次終於得嘗所願，估計佢最終隨隊出征俄羅斯嘅機會頗大。

門將
阿列沙巴拿加（畢爾包）、迪基亞（曼聯）、連拿（拿玻里）

後衛
佐迪艾巴（巴塞隆拿）、馬高斯阿朗素（車路士）、拿祖（皇家馬德里）、卡華積（皇家馬德里）、艾斯派古達（車路士）、奧迪奧蘇拿（皇家蘇斯達）、沙治奧拉莫斯（皇家馬德里）、碧基（巴塞隆拿）
中場
伊斯高（皇家馬德里）、泰亞高艾簡達拿（拜仁慕尼黑）、大衛施華（曼城）、恩尼斯達（巴塞隆拿）、沙奧尼古斯（馬德里體育會）、柏利祖（華倫西亞）、高基（馬德里體育會）、洛迪卡斯簡迪（維拉利爾）、阿辛斯奧（皇家馬德里）

前鋒
艾斯柏斯（切爾達）、洛迪高（華倫西亞）、迪亞高哥斯達（馬德里體育會）、盧卡斯華斯基斯（皇家馬德里）

*譯名以馬會球員名單為參考

Source: Sky Sports、Twitter